Mfanyabiashara Tunduma adaiwa kudhulumu watoto wa marehemu.

WATOTO wa marehemu Mohamed Stima, wamemwomba Waziri wa Ardhi, Nyumba na Maendeleo ya Makazi, Profesa Anna Tibaijuka, kuwasaidia kupata nyumba yao ambayo wamedhulumiwa na mfanyabiashara mmoja wa Tunduma.

Akizungumza mmoja wa watoto hao, Zaituni Mohamed (19), alisema kuwa anaiomba serikali kupitia wizara husika kuwasaidia kuwapatia nyumba yao ambayo waliachiwa urithi na wazazi wao walipofariki dunia.

Zaituni alisema kuwa baba yao, Mohamed Stima, wakati wa uhai wake alikuwa amejenga nyumba yake katika maeneo ya Kitongoji cha Majengo B, nyumba hiyo ilikuwa ikiwapa kipato, ikiwa ni pamoja na karo za shule.

Alibainisha kuwa nyumba yao ambayo ipo kwenye kiwanja Na. 64, kitalu G waliachiwa na baba yao marehemu kama sehemu ya urithi, lakini cha kushangaza walijitokeza watu na kuwafukuza katika nyumba hiyo, kwa madai kuwa si mali ya baba yao, na kwakuwa ni wadogo wameshindwa la kufanya hadi sasa.

Kwa upande wa mzee Winston Mwansumbi (62), ambaye hapo awali alikuwa mwenyekiti wa Kitongoji cha Majengo B na msimanizi wa nyumba ya watoto hao, alisema kuwa uongozi unajua wazi kuwa mali hiyo ilikuwa mali ya Mohamed Stima, alipokufa aliwaachia watoto.

“Huyu mtu ambaye alikuja hapa na kuvamia eneo la watoto na kuwavunjia nyumba yao hatumjui kijiji kizima, tunamshangaa, lakini inaonekana anatumia fedha nyingi kuwanyanyasa watoto hao ambao kwa sasa wanaishi maisha ya shida sana,” alisema Mwansumbi.

Aliiomba serikali kuwapatia msaada watoto hao ambao kwa sasa ni yatima, wanaishi maisha ya shida na wamefikia hatua ya kuwa ombaomba na wengine kushindwa kuendelea na masomo yao, jambo ambalo ni hatari, hasa kwa watoto wa kike, kwa kuwa wanaweza kujiingiza katika vitendo viovu.