Operesheni Kimbunga yasomba kijiji haramu.

OPERESHENI Kimbunga imeondoa kijiji haramu cha Nyamugali kilichokuwa chini ya wahamiaji haramu kutoka nchi ya Burundi katika Wilaya ya Kasulu, Kigoma.

Mkuu wa Wilaya ya Kasulu, Dan Makanga alisema hayo jana wakati akisoma taarifa ya maendeleo ya Wilaya mbele ya Waziri Mkuu, Mizengo Pinda.

Alisema ndani ya kijiji hicho haramu pia walikuwemo wahamiaji haramu waliokuwa na dola yao hapa nchini.

Makanga alisema lugha iliyokuwa ikitumika ndani ya kijiji hicho ni Kirundi na Kifaransa na hata shule zilikuwa zikifundishwa kwa lugha hizo kwa kufuata mitaala ya Burundi.

Mkuu huyo wa wilaya ambaye pia ni Mwenyekiti wa Kamati ya Ulinzi na Usalama ya Wilaya, alisema mbali ya kufanya hayo yote wakiwa nchini hapa, wahamiaji hao pia walikuwa wakipeperusha bendera ya nchi yao katika maeneo mbalimbali ya kijiji.

“Haiwezekani watu ni wahamiaji haramu halafu hata pesa wanatumia ya kwao ndani ya nchi nyingine… kupitia operesheni hii kimbunga imesafisha hayo yote na wahamiaji hao wamekimbia makazi yao kwani walikuwa wamejenga na kuishi watakavyo,” alisema Makanga.

Inakadiriwa takribani wahamiaji haramu 600 katika kijiji hicho wamekimbia baada kufanyika operesheni kimbunga.

Alisema zoezi hilo linakwenda vizuri na wamefanikiwa kukamata silaha mbalimbali japo kuna changamoto kwa baadhi ya watu kutotoa ushirikiano kwa vikosi vya ulinzi na usalama vinavyosimamia operesheni hiyo.

Waziri Mkuu Pinda alisema lengo la serikali kupitisha Operesheni Kimbunga ni kukabiliana na vitendo vyote vya uhalifu na kuifanya Tanzania kuwa mahali pa usalama.

Pinda alivipongeza vikosi vya ulinzi na usalama kwa kazi nzuri wanayofanya ya kuondoa wahamiaji haramu nchini, na kwamba changamoto zilizojitokeza wakati wa zoezi hilo zinafanyiwa kazi, hasa malalamiko ya baadhi ya watu kuwa walionewa.

Operesheni hiyo ni utekelezaji wa agizo la Rais Jakaya Kikwete alilolitoa Julai 29 mwaka huu akiwa katika ziara ya kikazi mkoani Kagera.