Mikoa sita yaomba kuandaa Tamasha la Krismasi.

MIKOA sita imeomba kuandaa Tamasha la Krismasi litakalofanyika Desemba 25 mwaka huu.

Taarifa iliyotolewa kwa vyombo vya habari jijini Dar es Salaam jana na Mwenyekiti wa Kamati ya Maandalizi ya tamasha hilo, Alex Msama, wamepokea maombi kutoka kwa wadau mbalimbali wa muziki wa Injili nchini wakiomba lifanyike katika mikoa yao.

Aliitaja mikoa hiyo kuwa ni Mbeya, Mwanza, Arusha, Dodoma, Dar es Salaam na Shinyanga.

“Tunachofanya kwenye kamati yangu ni kupokea maoni kwa njia mbalimbali ikiwemo simu za mikononi kutoka kwa wadau wetu kwamba wapi wanataka tamasha lifanyike.

“Kwa kipindi cha wiki moja tumepokea maombi mengi kutoka kwenye mikoa hiyo na kesho (leo), ndiyo siku ya mwisho tuliyoweka kwa ajili ya kupokea maombi, baada ya hapo tutatangaza mkoa gani utakuwa wa kwanza,” alisema Msama na kuongeza: “Lakini si kupendekezwa tu na wadau ndiyo kigezo cha kupewa nafasi, lazima tuangalie na mazingira ya mkoa husika katika mambo ya matamasha,” alisisitiza Msama.

Tamasha la Krismasi linaandaliwa na Kampuni ya Msama Promotion ya jijini Dar es Salaam, ambayo pia huandaa Tamasha la Pasaka kila mwaka.

Kwa mujibu wa Msama wanataka Tamasha la Krismasi liwe bora zaidi kuliko la Pasaka kwa kualika wasanii maarufu kutoka nje na ndani ya Tanzania.

Alisema hilo litakuwa tamasha kubwa la nyimbo za kumsifu Mungu na litakuwa na tofauti kubwa kulinganisha na matamasha mengine yaliyowahi kuandaliwa na kampuni yake.