Vijana wahimizwa kuchangamkia fursa.

VIJANA nchini, wametakiwa kujiunga na mifuko ya hifadhi ya jamii ili kujihakikishia usalama wa maisha bora kutokana na fursa zilipo kwenye mifuko hiyo iliyoko hapa nchini kwa sasa.

Wito huo, umetolewa na msanii wa kizazi kipya, Mwasiti Almasi, wakati akizungumza kwenye semina ya Fursa kwa vijana iliyofanyika kwenye viwanja vya Tangamano jiji hapa.

Mwasiti alisema kwa sasa vijana ndio nguvu kazi ya taifa inayotegemewa, lakini kutokana na kukosa uelewa  wa kuzitumia fursa zilizopo, vijna wengi wamekuwa tegemezi kwa familia zao na mzigo kwa taifa.

“Mtanzania wa kawaida kama unataka mitaji ya uhakika ingia kwenye mfuko wa NSSF, kwani mfuko huo umetusaidia sana sisi wasanii wa Kigoma All Stars, kwani umetukomboa kiuchumi na umetupa mwangaza mkubwa wa kimaendeleo,” alisema Mwasiti.

Naye msanii Nickson Simon ‘Nikki wa Pili’ alisema vijana wengi wamekosa taarifa sahihi kuhusu namna ya kutumia fursa zilizopo katika kujileta maendeleo yao na taifa kwa ujumla, hali inayowafanya waonekane ni tegemezi.

“Tatizo ni jinsi tunavyowaandaa vijana, kwani elimu wanayopata haiendani na mazingira ya fursa yaliyopo kwenye maeneo yao, utaona kijana toka anapata elimu ya msingi hadi chuo, hakuna kitu cha ujasiriamali alichojifunza wala taaarifa zozote kuhusu kujitegemea alizozipata,” alisema Nikki wa Pili.

Aliongeza kuwa ifike wakati vijana walioko shuleni wasiishie kupata elimu ya darasani, bali waandaliwe kwa ajili ya kuhakikisha wanapewa na elimu nyingine ya fursa zilizopo kwenye eneo husika walipo.

Hata hivyo, mwakilishi kutoka Mfuko wa Hifadhi ya Jamii (NSSF), Makao Makuu, Salim Kimaro, alisema  mfuko wao kwa sasa umejikita katika kuwasaidia vijana kiuchumi kwa kuwapa mikopo ambayo wataitumia kuendeshea biashara zao walizozibuni.

“Cha msingi ni vijana kujiunga katika vikundi na kuanzisha vyama vya akiba na mikopo (saccos), baada ya hapo wawe wanachama wa mfuko wetu na wawe wamechangia kwa kipindi cha miezi sita watapata fursa ya kukopeshwa fedha,” alisema Kimaro.