TFF limetoa onyo kali kwa watu watakaonaswa wakiwa na silaha kwenye viwanja vya soka.

WAKATI mechi za Ligi Kuu ya Vodacom zikitarajiwa kuendelea leo na kesho, Shirikisho la Soka Tanzania (TFF), limetoa onyo kali kwa watu watakaonaswa wakiwa na silaha za aina mbalimbali kwenye viwanja vya soka kama ilivyotokea wikiendi iliyopita.

Akizungumza na waandishi wa habari jijini Dar es Salaam jana, Ofisa Habari wa TFF, Boniface Wambura, alikiri watu 17 kukamatwa na bastola katika mechi mbili wikiendi iliyopita kwenye Uwanja wa Taifa, jambo ambalo ni kinyume na sheria za usalama viwanjani.

“Sheria za usalama za Shirikisho la Soka la Kimataifa (Fifa), haziruhusu mashabiki kuingia viwanjani na silaha hata kama wana umiliki halali. Watakaorudia tabia hiyo wikiendi hii hawatoruhusiwa kuingia uwanjani hata wakiwa na leseni na tiketi,” alisema Wambura.

Alibainisha kuwa mechi ya Yanga na Ruvu Shooting, watu 11 walikamatwa na bastola, kabla ya tukio hilo kujirudia tena wakati Simba ilipoumana na JKT Ruvu, ambako sita pia walikamatwa.

Wambura aliongeza kuwa watu wote waliokamatwa wikiendi iliyopita, walikuwa na leseni za umiliki, hivyo kuruhusiwa kuziacha mikononi mwa polisi na kwenda kuangalia mechi kisha kurejeshewa wakati wakiondoka, nafasi ambayo haitatolewa leo.

“Hata kama mtu awe na leseni halali ya umiliki, au awe na tiketi ya bei kubwa kiasi gani, hatoruhusiwa kuingia, hivyo mashabiki wanaomiliki silaha tunawashauri kuzihifadhi huko wanakotoka kabla ya kufika viwanjani,” alisisitiza Wambura huku akikataa kuwataja majina waliokamatwa wiki iliyopita kwa kuwa hana mamlaka kisheria.

Wambura alitoa wito kwa kwa kila shabiki atakayemuona mwenzake akiwa na silaha uwanjani, kutoa taarifa kwa mamlaka husika, likiwemo Jeshi la Polisi ili aweze kuchukuliwa hatua kwa kukiuka sheria ya usalama viwanjani.

Ukaguzi wa mashabiki wanaoingia viwanjani na silaha, umekuja wakati nchi za Afrika 

 Mashariki zikiomboleza vifo vya watu wanaokadiriwa kufikia 67 waliokufa katika shambulizi la kigaidi kwenye kituo cha biashara cha Westgate, jijini Nairobi na wengine 177 kujeruhiwa.

Kauli ya Wambura imekuja huku timu nane za Ligi Kuu zikitarajiwa kujitupa viwanjani leo.

Kwenye Uwanja wa Taifa, vinara Simba watakuwa wageni wa Ruvu Shooting katika pambano linalotabiriwa kuwa na upinzani.

Viingilio katika mechi hiyo itakayochezeshwa na mwamuzi Mohamed Theofil kutoka Morogoro kuanzia saa 10:00 jioni vitakuwa sh 5,000, sh 8,000, sh 15,000 na sh 20,000.

Mechi nyingine, maafande wa JKT Ruvu watawaalika Kagera Sugar kwenye Uwanja wa Azam Complex, huku Coastal Union na Azam FC zikitunishiana misuli Mkwakwani jijini Tanga.

JKT Oljoro watakuwa nyumbani Sheikh Amri Abeid jijini Arusha kuwaalika Mbeya City, wakati kesho kutakuwa na kibarua kigumu kati ya Yanga na Mtibwa Sugar Uwanja wa Taifa, huku Mgambo wakiwakaribisha Tanzania Prisons, Mkwakwani.