Pluijm aacha kazi Yanga

Kocha Mholanzi wa Yanga, Hans van Der Pluijm.

Na Wilbert Molandi
KOCHA Mholanzi wa Yanga, Hans van Der Pluijm, ameacha kazi katika klabu hiyo.
Pluijm ameondoka nchini jana kwenda Saudi Arabia, Mashariki ya Kati barani Asia ambako ataingia mkataba wa kuinoa Klabu ya Al Shoala na atakuwa akilipwa dola 20,000 (Sh milioni 32) kwa mwezi wakati Yanga ilikuwa ikimlipa dola 11,000 (Sh milioni 18) kwa mwezi.
Pluijm alitua Yanga miezi michache iliyopita kuchukua nafasi ya Mholanzi mwenzake, Ernie Brandts ambaye msimu uliopita aliipa timu hiyo ubingwa wa Bara.

Pluijm, raia wa Uholanzi, amesema amelazimika kuiacha Yanga kutokana na ofa yake kubwa aliyoipata na kilichosababisha aipate ni soka la juu walilolionyesha Yanga wakati wakiivaa Al Ahly ya Misri.
“Kweli nimepata ofa kubwa sana, lazima niondoke na nitasaini mkataba wa mwaka mmoja kuifundisha timu hiyo. Nimewaambia Yanga na tumekubaliana, baada ya msimu mmoja nitauliza, kama watanihitaji nitarudi,” alisema.
Wakala wa Misri:
Kuhusiana na kupata nafasi hiyo, Pluijm anasema wakala kutoka nchini Misri ndiye alifanya mipango ya kumpatia timu nchini humo baada ya kuiona Yanga ikiihenyesha Al Ahly katika mechi ya Ligi ya Mabingwa Ulaya.
“Nafikiri alianza kunifuatilia kabla, lakini baada ya mechi mbili za Al Ahly, tulianza mawasiliano naye. Mwisho akanielekeza katika ofa hiyo ya juu ambayo ninalazimika kwenda, hakuna ujanja,” alisema Pluijm ambaye aliondoka jana mchana kwa Ndege ya Shirika la Ethiopia.
Makubaliano:
Pluijm na Yanga wameingia makubaliano kwamba baada ya kusaini mkataba huo, kocha huyo arejee nchini kwa ajili ya kuwasaidia Wanajangwani.
“Bado nina mapenzi na Yanga, naona kama niko nyumbani. Hivyo nitasaini mkataba na kurudi hapa, baada ya hapo nitasafiri kwenda Ghana kusaidia kutafuta wachezaji.
“Zaidi nina mawasiliano na kiungo na mshambuliaji, ndiyo mahitaji ya Yanga. Hivyo nitatoka hapa na kwenda kufanya majadiliano kuhusiana na kuwasajili ili kukiimarisha kikosi cha Yanga,” alisema Pluijm.
Al Shaola:
Inashika nafasi ya 12 katika timu 14 zinazoshiriki Ligi Kuu Saudi Arabia na rekodi ya mechi zake tatu za mwisho inaonyesha imepoteza mbili na sare moja.