Kocha wa Simba afariki, Niyonzima amlilia

KOCHA Jean Marie Ntagwabila raia wa Rwanda aliyetakiwa kutua kuifundisha Simba mwanzoni mwa Januari, mwaka huu, amefariki dunia jana Jumanne asubuhi nchini Rwanda.
Ntagwabila alitarajiwa kutua kukinoa kikosi hicho ili awe msaidizi wa Mserbia, Goran Kopunovic, kabla ya kumkataa na kumtaka Mrwanda mwingine Alphonce Gatare, aliyekuwa naye Polisi ya Rwanda lakini naye hakuja na Simba imebaki na Selemani Matola.
Ntagwabila alipatwa na umauti akiwa kwenye Hospitali ya Jeshi Kanombe, iliyopo nchini humo baada ya kusumbuliwa na ugonjwa wa mapafu.
Marehemu aliwahi kuzifundisha klabu za Rayon Sport, Kiyovu Sport na APR FC, zikiwa tatu za juu tishio na pinzani katika Ligi Kuu ya Rwanda ambaye hadi umauti unamkuta, alikuwa Meneja wa Sunrise FC ya Rwanda.

Kifo cha kocha huyo kimemsikitisha kiungo mchezeshaji wa Yanga, Mnyarwanda, Haruna Niyonzima ambaye aliwahi kumfundisha akiwa anaichezea APR.
“Nimepata taarifa za kifo cha Ntagwabila, kiukweli kimenishtua sana, hizo taarifa nilizipata kutokea nyumbani baada ya kupokea simu nyingi kutoka kwa ndugu na marafiki zangu, namtakia maisha mema huko peponi.
“Mimi alikuwa kocha wangu aliyewahi kunifundisha kwenye timu ya taifa ya Rwanda, ila pia alikuwa rafiki yangu sana, yaani alikuwa kama baba yangu kutokana na kunishauri kila wakati,” alisema Niyonzima.