Tambwe amzuia Pluijm kumtaja Okwi

Na Nicodemus Jonas
KOCHA wa Yanga, Hans van Der Pluijm, ameshikwa na kigugumizi cha kuzungumzia kama kwa sasa nyota wake wa zamani Emmanuel Okwi anaweza kuwasaidia kwa kuogopa kuwavunja moyo washambuliaji wake, akiwemo Amissi Tambwe.
Mholanzi huyo amekiri kulizwa na safu yake ya ushambuliaji kushindwa kufanya vyema msimu huu, tofauti na msimu uliopita ambapo ilikuwa tishio ikiwa na kumbukumbu ya rekodi ya kufunga mabao 19 katika mechi tatu; dhidi ya Komorozine, Ruvu Shooting na Tanzania Prisons.
Kocha huyo amesema kuwa kwa sasa anajaribu kuwajengea mazingira ya kujiamini zaidi washambuliaji wake na kwamba si muda wa kuangalia pengo la mchezaji kama Okwi kwa kuwa watavunjika moyo.
Safu ya Yanga kwa sasa inawategemea Amissi Tambwe, Kpah Sherman na Danny Mrwanda. Lakini bado imekuwa ya kusuasua, huku mfungaji bora wa  klabu akiwa ni  Simon Msuva ambaye ni winga akiwa na mabao manne.
 Akizungumza na Championi Jumatano, Pluijm alisema kuhusu kiwango cha kikosi chake haoni tofauti na msimu uliopita, ila kasoro ni moja tu, kutumbukiza mpira wavuni.
“Huu siyo muda wa kuzungumzia pengo la mtu kama Okwi ambaye aliondoka, macho na akili yangu ni kujaribu kuwapa mbinu za kujiamini na kurekebisha kasoro zilizopo ili tuweze kupata matokeo mazuri katika mechi zijazo. Kuna tofauti kubwa kati ya kiwango na matokeo, tofauti na msimu huu ni kitendo cha kutumbukiza mpira wavuni tu, ndiyo maana najaribu kuwajengea mazingira ya kujiamini zaidi wawapo kwenye eneo la kufunga, kama nikisema Okwi alikuwa hivi wala vile hawawezi kujisikia vizuri,” alisema Pluijm.