Kawemba afagilia uozo marefa Ligi Kuu.

Na Salum Mkandemba wa Tanzania Daima.

WAKATI malalamiko kwa waamuzi wa Ligi Kuu Tanzania Bara kuhusu kuboronga yakishika kasi, Mkurugenzi wa Mashindano wa Shirikisho la Soka Tanzania (TFF), Saad Kawemba, amewakingia kifua na kudai uamuzi wa haki zaidi ya walioutoa haupatikani duniani.

Akizungumza na kipindi cha Tuongee Asubuhi – Michezo, kinachorushwa na kituo cha Star TV cha jijini Mwanza kila siku za Alhamisi, Kawemba alisema kuwa kamati yake imeridhishwa na kiwango cha uchezeshaji cha waamuzi hao, licha ya kukiri kuwapo kwa kasoro kadhaa, akidai ni za kibinadamu.

Kawemba alisema kuwa waamuzi kama walivyo binadamu wengine, hawawezi kufanya uamuzi wa kumfurahisha kila mmoja, huku akidai, kutovunjika mechi yoyote kutokana na uamuzi wao, ni uthibitisho mwingine kwamba walikuwa makini katika mechi hizo.

“Niseme ukweli kiwango cha uchezeshaji wao kilikuwa kizuri na kimetuvutia. Najua wapo ambao hawakupendezwa nayo, lakini ndivyo binadamu tulivyo. Haki ya kiwango hicho hupatikana mbinguni, sio duniani,” alisema Kawemba aliyekuwa akizungumzia usajili wa dirisha dogo Januari mwakani.

Kawemba alisema kuwa hatua kali kwa waamuzi wabovu na wazembe zilizochukuliwa mapema mwanzoni mwa msimu huu wa 2012/13, zilisaidia kuongeza umakini miongoni mwao, kiasi cha kuimarisha utendaji wao dimbani hadi kumalizika kwa mzunguko wa kwanza.

Akaenda mbali zaidi na kukosoa kauli za makocha wa klabu za Ligi Kuu, juu malalamiko yao kuwa viwanja vibovu mikoani ndiyo chanzo cha matokeo mabovu ya timu zao na kuwataka kufanya tathmini za matokeo chanya pindi zinaposhinda na sio kutathmini matokeo hasi tu.

“Sisi kama TFF tunaishukuru sana serikali kwa kukubali kutupa Uwanja wa Taifa kwa matumizi ya Ligi Kuu. Haiwezekani viwanja vyote vikawa kama ule, fursa tuliyopata ya kuutumia, isiwalemaze baadhi ya makocha kiasi cha kutarajia viwanja vyote nchini kuwa kama Taifa,” alisaema.

Katika mzunguko wa kwanza uliofikia tamati hivi karibuni, kilio kikubwa kilikuwa ni kuvurunda kwa waamuzi wa Ligi Kuu, kulikotokana na ama kushindwa kutafsiri sheria au upindishaji wa kawaida, utokanao na mapenzi au rushwa, kitu kilichothibitishwa na kuondolewa au kufungiwa kwa baadhi yao.

Baadhi ya waamuzi waliokumbana na adhabu za kufungiwa, kuondolewa au kuonywa katika Ligi Kuu kutokana na kuvurunda ni pamoja na Mathew Akrama na Paul Soleji wa Mwanza, Ephraim Ndissa, Mwarabu Mumbi, Ronald Swai na Kamishna Pius Mashera.