Meya Silaa akaliwa kooni

MEYA wa Manispaa ya Ilala ambaye pia ni Diwani wa Kata ya Gongolamboto jijini Dar es Salaam, Jerry Silaa ametakiwa kutoa ufafanuzi juu ya sh milioni 100 zilizotengwa kwa ajili ya matengezo ya barabara katika bajeti ya 2011/2012.

                                                                      Jerry Silaa
Hayo yalisemwa na wanachama wa Chama cha Demokrasia na Maendeleo (CHADEMA), wa kata hiyo kwenye mkutano wa hadhara waliouandaa.

Akizungumza katika mkutano huo, Katibu wa Jimbo la Ukonga, Juma Mwaipopo, alisema kuwa fedha hizo zilizotengwa na Halmashauri ya Ilala katika kipindi hicho hadi sasa hazijafahamika zimefanyiwa nini.

Alisema kuwa halmashauri ilitenga sh bilioni 93 kwa matumizi ya jimbo hilo, zikiwemo sh milioni 100 kwa kata sita ambazo zingetumika kwa ajili ya upanuzi na matengenezo ya barabara pamoja na kusambaza huduma ya maji kwa wananchi, jambo ambalo limekuwa ni kitendawili.

Alisema kuwa eneo hilo kijiografia lina wakazi wengi, lakini wachache wao ndio waliounganishwa na huduma ya maji safi kutoka bomba la Mto Ruvu, huku baadhi wakitumia maji ya visima na wengine kununua katika magari yanayosambaza huduma hiyo.

“Tunahitaji kuwa na maamuzi ya pamoja juu ya Silaa, kwa sababu hatujui tumetoka wapi wala tunaelekea wapi hadi sasa? Inawezekana hajui kazi yake kwa sababu hatuna maendeleo wala mabadiliko katika kata yetu, Watanzania tudai haki ambazo serikali ilituahidi itazitekeleza bure” alisema Mwaipopo.

Alipoulizwa kuhusu tuhuma hizo, Silaa alisema fedha hizo ziko chini ya Mkurugenzi wa halmashauri, na zitatolewa kwa utaratibu baada ya kukaguliwa na Mdhibiti na Mkaguzi Mkuu wa Hesabu za Serikali (CAG).