Wanawake waanza kunufaika na mikopo.

WIKI moja baada ya Mbunge wa Viti Maalumu, Chiku Abwao (CHADEMA) kuzindua kikundi cha wanawake cha Mafuruto, wanawake hao wameanza kunufaika na mkopo kwa ajili ya kuendeshea shughuli zao za ujasiriamali.

 

                                  Mbunge wa Viti Maalumu, Chiku Abwao (CHADEMA).

Akitoa mkopo kwa wanawake hao, mwanzoni mwa mwaka huu, mbunge huyo alisema anataka kuwa tofauti na wanasiasa wengine ambao huishia kuahidi na kupotea bila kutekeleza ahadi.

Alisema lengo la kufanya hivyo ni kuwawezesha wanawake waweze kujitegemea na kuachana na tabia ya kusubiri wakati wa kampeni na kupewa vitenge kama kishawishi cha kupiga kura.

“Hii tabia ya kusubiri vitenge kwenye kampeni iishe kwa sababu mtakuwa mna uwezo wa kujitegemea,” alisema.

Abwao alisema kuwahadaa wanawake ni kuyumbisha maendeleo kwa kuwa wanawake wana mchango mkubwa wa kuleta maendeleo kwa taifa.

Hata hivyo, alisema nchi inakosa viongozi bora kwa sababu ya watu wenye pesa wanawatumia maskini kuwahonga, ili wawachague.

Naye Katibu Mtendaji wa kikundi hicho, Yusta Udamwa, alisema endapo taifa litatambua mchango wa wanawake, uchumi utasonga mbele.

Mwisho