IRENE MWAMFUPE JAMII: ZIARA YA MAMA SALMA KIKWETE MKOANI LINDI SIKU YA JANA

Sunday, February 17, 2013

ZIARA YA MAMA SALMA KIKWETE MKOANI LINDI SIKU YA JANA

Mke wa Rais Mama Salma Kikwete amewataka wakazi wa kijiji cha Kineng’ene kata ya Mtanda wilaya ya Lindi mjini kujiunga na huduma ya mfuko wa afya ya jamii (CHF) unaotolewa na Mfuko wa taifa wa bima ya afya (NHIF) ili waweze kuepukana na gharama za matibabu za mara kwa mara wanazolipa pindi wanapougua wakati ambao hawana fedha.

Mama Kikwete ambaye pia ni Mjumbe wa Halmashauri kuu ya Chama Cha Mapinduzi (CCM) taifa (NEC) toka wilaya hiyo aliyasema hayo jana alipokuwa akijibu swali la mkazi wa kijiji hicho Sophia Lihame kuhusiana na gharama za upatikanaji wa huduma ya afya wanazolipa kwenye mkutano wa hadhara wa chama hicho uliofanyika katika kijijini hicho. Alisema kuwa gharama ya kujiunga na mfuko wa afya ya jamii ambayo katika wilaya hiyo inajulikana kama tiba kwa kadi si kubwa ukilinganisha na huduma inayotolewa kwani familia ya watu sita inachangia shilingi 10000 katika halmashauri ya wilaya fedha ambayo inatumika kwa kipindi cha mwaka mmoja.

Mjumbe huyo wa NEC pia aliwataka wakazi wa kata hiyo kutoogopa kupima afya zao ili waweze kujua kama wamepata maambukizi ya Virusi vya Ugonjwa wa Ukimwi (VVU) au la kwani kwa kufanya hivyo kutawawezesha kulinda kinga za miili yao.

Mjumbe wa Halmashauri Kuu ya Taifa ya CCM, Mke wa Rais Mama Salma Kikwete akisalimiana na wananchi wa kijiji cha Narunyu, Kata ya Tandangongoro, alipokwenda kuhutubia mkutano wa hadhara katika kijiji hicho leo, Feb 16, 2013.

Mjumbe wa Halmashauri kuu ya CCM Lindi Mama Salma Kikwete akihutubia mkutano wa hadhara katika kijiji hicho, Feb 16, 2013.

Mkazi wa Kijiji cha Ng’apa wilaya ya Lindi mjini, akionyesha kadi yake ya matibabu ya Huduma ya Kadi ulkiopo chini ya Bima ya Afya, wakati wa mkutano wa hadhara uliohutubiwa na Mjumbe wa Halmashauri Kuu ya Taifa ya CCM, Mke wa Rais Mama Salma Kikwete katika kijiji hicho, Feb 16, 2013. Mama Salma Kikwete alimpatia fursa ya kuzungumza wakati akihimiza umuhimu wa wananchi kujiunga na mpango huo wa matibabu.

Mjumbe wa Halmashauri Kuu ya Taifa ya CCM, Mke wa Rais Mama Salma Kikwete akiwa amegoma kushuka katika gari lake, kukataa kwenda kwenye mkutano wa ndani wa Chama Kata ya Tandangongoro, uliokuwa umepangwa na viongozi wa kata hiyo kufanyika katika chumba cha darasa la shule ya msingi ya kijiji cha Ng’apa, mkoani Lindi, Februari 16, 2013. Hatua hiyo iliwalazimu viongozi kutafuta ukumbi mwingine wa dharura. Mama Salma alisema si sahihi mkutano wa ndani wa Chama cha siasa kufanyika katika chumba cha darasa la shule ya serikali

Umati wa wananchi wa Kijiji cha Ng’apa wakimsiliza Mjumbe wa Halmashauri Kuu ya Taifa ya CCM, Mke wa Rais Mama Salma Kikwete akilipowahutubia mkutano wa hadhara jana, Feb 16, 2013.

Mke wa Rais Mama Salma Kikwete akikaribishwa na viongozi wa Tawi la Chama Cha Mapinduzi la Nanyanje lililoko katika kata ya Chikonji katika wilaya ya Lindi kwa ajili ya mkutano na viongozi wa Tawi na baadaye na wananchi wa kata hiyo tarehe 15.2.2013.

(PICHA NA JOHN LUKUI WA MAELEZO)

Mke wa Rais Mama Salma Kikwete na Mjumbe wa Halmashauri Kuu ya CCM anayewakilisha wilaya ya Lindi akiongea na viongozi wa Kata ya Chikonji kwenye tawi la Nawanje tarehe 15.2.2013.