Moshi, Arusha kuingia dijitali

Mamlaka ya Mawasiliano Tanzania (TCRA) imesema, inatarajia kuzima mitambo ya kurusha matangazo ya televisheni ya mfumo wa analojia katika Mji wa Moshi na Jiji la Arusha Machi 31 mwaka huu.

Kuzimwa kwa maeneo hayo kunafikisha jumla ya mikoa sita ambayo ni Dar es Salaam, 

Tanga, Dodoma na Mwanza  ambayo tayari inapokea matangazo ya televisheni kwa njia ya dijitali na kubaki Mkoa wa Mbeya utakaozimwa Aprili 30, mwaka huu.

Meneja  Mawasiliano wa Mamlaka hiyo, Inocent Mungi akizungumza katika kipindi cha Jambo Tanzania cha Shirika la Utangazaji TBC1  juzi, aliwataka wadau kushirikiana na TCRA ili kuondoa changamoto zilizopo zinazotokana na mfumo huo.

“Bado tutaendelea kutoa elimu na tumebakiza miezi 18 katika kuhamia mfumo wa dijitali kwa dunia nzima, hivyo ni lazima kujidhatiti”alisema Mungi.

Meneja huyu akifafanua kuhusu baadhi ya wamiliki wa vituo vya televisheni ambao wamekuwa wakitoa taarifa za kutaka kujitoa kurusha matangazo kutokana na kuelemewa na gharama alisema hawana ukweli wowote.

“Wamiliki wote wa vituo wakati wakisaini leseni za kurusha matangazo walikubali kuhimili gharama, hivyo kusema hawana uwezo wanakuwa wanatofautiana na leseni zao” alisema Mungi.

Kauli hiyo ya Mungi inafuatia Kauli ambazo zimekuwa zikitolewa na Chama cha Wamiliki wa Vyombo vya habari (Moat) kusitisha kurusha matangazo.