DARAJA LA MTO WA JANGWANI BEACH LIKO HATARINI MANISPAA YA KINONDONI DAR.

Daraja la Mto wa Jangwani Beach, Manispaa ya Kinondoni, Jijini Dar es salaam liko hatarini kuvunjika kutokana na mvua zinazoendelea kunyesha Jijini humo huku Wakazi wa eneo hilo wakieleza kuwa pamoja na Serikali kuwa na taarifa imekuwa ikilifumbia macho tatizo hilo.
 

Wakizungumza na Clouds Fm, baadhi ya wakazi wa eneo hilo, wamesema kuharibika kwa daraja hilo kumesababishwa na kitendo cha Wakandarasi wanaopewa zabuni ya kujenga miundombinu ya barabara kutojenga katika kiwango kinachotakiwa.
 

Wakazi hao wameongeza kuwa kutokana na ubovu wa miundombinu ya daraja hilo wamekuwa wakipata adha kubwa kufuatia daraja kufunikwa na maji pindi mvua zinaponyesha.

Wakizungumza Wanafunzi wa Shule ya Msingi Jangwani Beach, iliyopo pembezoni mwa Mto wa jangwani beach, ambao wanaeleza athari wanazokumbana nazo pindi mto huo unapojaa maji ambayo huelekea moja kwa moja katika shule hiyo.
 

Kwa upande wake Mwalimu Mkuu Msaidizi wa Shule hiyo, EL– AJUAE MARO amesema pamoja na kufikisha taarifa kwa serikali ya Mtaa wa Kilonga Wima na kwa Mkurugenzi wa Manispaa ya Kinondoni, Jijini Dar es salaam kuhusiana na tatizo hilo hakuna hatua zozote zilizochukuliwa.