Mahakama ya Ghana kusikiliza kesi ya uchaguzi.

Mahakama ya Kilele nchini Ghana hapo kesho Jumanne itaanza kusikiliza kesi inayopinga ushindi wa Rais John Dramani Mahama kwenye uchaguzi wa rais uliofanyika mwezi Disemba mwaka uliopita.

Kesi hiyo inadaiwa kuligawa taifa katika makundi mawili. Mpinzani wa Mahama, Nana Akufo-Addo alikwenda mahakamani kupinga ushindi huo kwa madai kwamba hila, udanganyifu na wizi wa kura vilitawala zoezi zima la uchaguzi.

Weledi wa siasa za Ghana wanasema kesi hiyo ni changamoto kubwa kwa demokrasia changa ya nchi hiyo ya magharibi mwa Afrika. Mahakama hiyo ya kilele inaweza kutoa hukumu ama ya kumuidhinisha Mahama kwa msingi kwamba alichaguliwa kihalala au pia inaweza kuhukumu kwamba Nana Akufo-Addo ndiye aliyeshinda uchaguzi huo na vilevile inaweza ikaamuru uchaguzi huo urudiwe upya.

Inafaa kukumbusha hapa kuwa, uchaguzi wa rais wa Disemba mwaka jana ulifanyika kufuatia kifo cha rais John Atta Mills mwezi Julai mwaka jana.