Mil. 100/- zambakiza Niyonzima Yanga.

HATIMAYE kitita cha dola 70,000 za Marekani (zaidi sh Mil. 100) kimemaliza ‘ngonjera’ za usajili wa kiungo wa kimataifa ya Yanga, Haruna Niyonzima, raia wa Rwanda.

Niyonzima ambaye mkataba wake wa kukipiga kwa mabingwa hao wa soka Tanzania Bara ulikuwa umemalizika msimu huu, alitawala vichwa vya mashabiki wengi wa soka hapa nchini, baada ya kudaiwa kugoma kuongeza mkataba na kutaka kutimkia kwa mahasimu wao Simba.

Niyonzima, nyota aliyeziteka hisia za mashabiki wa klabu hiyo, ameamua kubaki kuendelea kuitumikia klabu hiyo kwa miaka miwili, baada ya uongozi kuridhia kumpa kitita hicho.

Mmoja wa viongozi wa juu wa Yanga, ambaye hakutaka jina lake kutajwa gazetini, alisema wamejitahidi kupigana kufa au kupona ili mchezaji huyo aendelee kuitumikia klabu hiyo na kuepusha madaraka yao kuingia doa.

“Uongozi tumepigana sana huku na kule ili kuhakikisha Niyonzima anaendelea kucheza Yanga na ndiyo maana tumefanikisha mara baada ya kumpa dola 70,000 ili aweze kumwaga wino na tunamshukuru Mungu tumefanikiwa,” alisema kiongozi huyo.

Aidha, chanzo hicho kilisema kuwa kwa sasa uongozi umepumua mara baada ya kumaliza suala la Niyonzima, ambalo lilionekana kuwa gumzo na kuwanyima usingizi mashabiki, wadau na wanachama wa Yanga.

Katika hatua nyingine, Katibu Mkuu wa klabu hiyo, Lawrence Mwalusako aliyeambatana na Mwenyekiti wa Kamati ya Mashindano Abdallah Binkleb, Mjumbe wa Kamati ya Utendaji Musa Katabaro na Mjumbe wa Bodi ya Wadhamini, Fransis Kifukwe alisema wameamua kuutangaza mkataba mpya wa mchezaji huyo, kutokana na simu mbalimbali walizokuwa wanazipata kutoka kwa mashabiki wao wenye mapenzi ya dhati na klabu hiyo.

Mara baada ya kumtambulisha upya Niyonzima, Mwalusako alimpa zawadi ya kofia na skafu zenye nembo na jina la klabu hiyo ikiwa ni sehemu ya kuthamini mchango wake Jangwani.

Akizungumzia mkataba huo, Niyonzima alisema yeye anaheshimu mpira kwa kuwa ndiyo kazi yake na kuwa uvumi uliokuwa umetapakaa kuwa anakwenda Simba, yeye ndiye mwamuzi wa kila kitu na kudai kuwa sio kusema kuwa uwepo wake Yanga unamnyima nafasi ya kuongea na watu wengine.

“Mimi kumaliza mkataba Yanga sio kwamba utanizuia kuongea na timu au mtu yeyote, hayo ni maamuzi yangu mwenyewe ila nimesaini Yanga miaka miwili,” alisema Niyonzima.

Naye Binkleb alisema mbali na Niyonzima, kuna nyota watatu pamoja na Kocha Mkuu wao Ernie Brandts, hawana mikataba hadi sasa baada ya awali kuwa imemalizika.

Aliwataja nyota hao kuwa ni Nizar Khalfan, Hamis Kiiza na Nurdin Bakari na kudai kuwa wako katika mazungumzo nao ili kuwapa mikataba mingine, huku kwa upande wa Brandts, wanamsubiri atakaporejea Juni 2 akitokea nchini Uholanzi katika mapumziko.