Wanafunzi nusura wachome kituo cha polisi wilayani Kalambo, Rukwa.

KITUO cha Polisi Mwimbi, wilayani Kalambo, Rukwa, kimenusurika kutekwa na kuchomwa moto baada ya kundi la wanafunzi wa Shule ya Sekondari Mwimbi kuandamana kwa lengo la kukiteketeza kituo hicho.

Tukio hilo limetokea juzi, majira ya saa 8:30 usiku baada ya wanafunzi hao kuiteketeza kwa moto nyumba ya mkuu wao wa shule na kisha kuelekea kituo cha polisi kwa madai kuwa wanapinga kitendo cha polisi kuwadhibiti kuiteketeza nyumba ya mkuu wa shule hiyo.

Akizungumza na waandishi wa habari jana, Kaimu Mwenyekiti wa Kamati ya Ulinzi na Usalama ya Mkoa wa Rukwa, Moshi Chang’a, alisema chanzo cha vurugu hizo ni wanafunzi kupinga adhabu ya kufyatua matofali kutokana na kitendo cha kutoroka shuleni mara kwa mara.

Chang’a ambaye pia ni Mkuu wa Wilaya ya Kalambo, alisema baada ya wanafunzi hao kupewa adhabu hiyo waliandaa mkakati kwa siri na kisha majira ya saa 6 usiku wakiongozwa na mwenzao, Aidan Lunguje, mwanafunzi wa kidato cha nne walivamia nyumba ya mkuu wa shule, Willbrod Lucas na kisha kuichoma moto.

Mwenyekiti huyo alisema kabla wanafunzi hao hawajaifikia nyumba hiyo, mkuu huyo wa shule alitumiwa ujumbe mfupi wa maandishi ukimtaka aondoke nyumbani yeye na familia yake kwani kuna kundi la wanafunzi litavamia muda si mrefu.

“Baada ya kupata ujumbe huo alimwamsha mkewe na watoto kisha kuingia katika shamba la mahindi lililopo jirani na nyumba hiyo na ndipo muda mfupi baadaye aliona kundi kubwa la wanafunzi wakiwa na mapanga, mawe, visu, marungu na dumu la mafuta na kisha kuanza kuvunja milango ya nyumba,” alisema.

Chang’a alisema baada ya wanafunzi hao kuvunja mlango na kukosa mtu walianza kuiba mali mbalimbali kisha kuichoma moto nyumba hiyo na kufyeka mazao yaliyokuwa shambani.

Wakati wanafunzi hao wakiendelea na uhalifu, polisi wa Kituo cha Mwimbi walipata taarifa na kwenda eneo la tukio na ndipo wanafunzi walipochukia na kuamua kwenda kuvamia kituo cha polisi ili wakichome moto, lakini kabla hawajakifikia mwenyekiti wa kijiji alifyatua risasi hewani, kitendo kilicholeta hofu na wanafunzi hao kutawanyika.