Wanaume wahimizwa kuwasindikiza wake zao kliniki.

MKUU wa Wilaya ya Iramba, Yahaya Nawanda, amewahimiza wanaume kuwasindikiza wake zao wanapokwenda kwenye vituo vya kutolea huduma za mama na mtoto ili nao wakasikilize ushauri nasaha ili iwe rahisi kwao kutekeleza.

Mkuu huyo wa wilaya alitoa changamoto hiyo kwenye hafla fupi ya kuzindua huduma ya kliniki tembezi iliyofanyika kwenye kituo cha afya cha Ndago, wilayani hapa.

Alisema halitakuwa jambo la busara kwa wanaume wanapowaona wake zao wakienda kliniki na wao wakabaki nyumbani ama kwenda kwenye shughuli nyingine.

“Naomba niwaase wanaume twende kliniki na wake zetu, haitakuwa na maana yeyote ile iwapo mwanamume atamuacha mkewe anakwenda kliniki peke yake,” alisema.

Kwa mujibu wa Nawanda, mwanamume anapokwenda na mkewe kliniki hupatiwa ushauri nasaha na wataalamu wa afya juu ya elimu ya kulea mimba pamoja na kutunza mtoto na kuongeza kwamba hata mtoto akizaliwa anakuwa na uhakika wa kuishi.

Mwenyekiti wa wakuu wa wilaya wa Mkoa wa Singida, Mwalimu Queen Mlozi, alitumia nafasi hiyo kuwatahadharisha watendaji pamoja na wananchi wa wilaya hiyo kutobweteka kutokana na sifa walizopata za kuongoza katika kutoa huduma za Mfuko wa Afya ya Jamii (CHF) nchini.

Mkuu wa Wilaya ya Manyoni, Fatma Toufiq, alisema ushindi wa wilaya hiyo katika sekta ya afya, usibakie kwenye wilaya moja ya mkoa huo na badala yake wilaya zote ziwe mabingwa wa kutoa elimu hiyo kwa wilaya nyingine hapa nchini.