Wataalamu wa upasuaji tundu dogo watua nchini

MADAKTARI bingwa wa upasuaji wa tundu dogo kutoka Misri wametua nchini kwa ajili ya kuwafanyia upasuaji wagonjwa walio kwenye Hospitali ya Taifa Mumbili (MNH) na kuwapa uzoefu madaktari wa Tanzania.

Akizungumza na waandishi wa habari jana wakati wa kuwatambulisha madaktari hao Waziri wa Afya na Ustawi wa Jamii, Dk. Hussein Mwinyi, alisema lengo la kufanya hivyo ni kuwapa uzoefu madaktari wa hapa nchini kwa kuwa huduma hiyo hapa bado haijaanza.

“Madaktari wa hapa nchini watanufaika kwa kupata mafunzo ya kitaalamu ya upasuaji wa tundu dogo, yatakayotolewa na madaktari bingwa kutoka nchini humo na baadhi ya wagonjwa waliochaguliwa kwa sababu maalumu za kitabibu nao watanufaika,” alisema Dk. Mwinyi.

Alisema hiyo si mara ya kwanza kwa Tanzania na Misri kushirikiana katika masuala ya afya, kwani madaktari wao wamekuwa wakitoa huduma sehemu mbalimbali nchini, hasa katika utaalamu ambao madaktari wetu hawana.

Alisema timu hiyo ya madaktari inajumuisha madaktari sita wa upasuaji na wataalamu wawili huku akiishukuru nchi ya Misri kwa kuwa na moyo wa kuwasaidia Watanzania hasa sekta ya afya.

Kaimu Mganga Mkuu wa Serikali, Dk. Donan Mmbando, alisema madaktari hao watakuwa katika hospitali ya Muhimbili na wagonjwa watakaopata bahati ya kuhudumiwa ni wale ambao walikwishaandaliwa kwa mujibu wa taratibu za kidaktari.

Naye balozi wa Misri nchini, Hossam Omar, alisema amefurahi kuona wanashirikiana na Watanzania na kwamba ushirikiano huo hautaishia hapo huku akiahidi huduma nyingine zaidi hapo baadaye.