Moto wateketeza kiwanda cha mbao

KIWANDA cha kuchakata mbao cha Bedeko Traders Ltd, kilichopo Mtoni Mtongani, wilayani Temeke, Dar es Salaam kimeteketea kwa moto.

Kamanda wa Polisi Mkoa wa Temeke, Englibert Kiondo, alisema moto huo ulizuka juzi saa 9 usiku katika kiwanda kinachomilikiwa na Benny Komba (68) mkazi wa Mbagala Mashine ya Maji.

Kamanda Kiondo alisema chanzo cha moto huo akijafahamika na thamani ya mali iliyoungua ni zaidi ya sh milioni 20 huku akibainisha kwamba moto huo ulizimwa na Kikosi cha Zima Moto na Uokoaji cha jiji hilo, wakishirikiana na wakazi wa eneo hilo.