IGP apangua vigogo 18 Polisi

 

MKUU wa Jeshi la Polisi nchini, Inspekta Jenerali wa Polisi (IGP) Ernest Mangu, amefanya mabadiliko ya baadhi ya makamanda wa mikoa, wakuu wa upelelezi wa mikoa, wakuu wa usalama barabarani wa mikoa pamoja na watendaji wengine wa vikosi na vitengo mbalimbali ndani ya Jeshi la Polisi.

Taarifa ya Jeshi la Polisi kwa vyombo vya habari iliyotolewa na Msemaji wa jeshi hilo, Mrakibu Mwandamizi wa Polisi (SSP) Advera Senso, ilieleza miongoni mwa makamanda wa mikoa waliofanyiwa mabadiliko ni aliyekuwa Kamanda wa Mkoa wa Ruvuma, Kamishna Msaidizi Mwandamizi wa Polisi (SACP) Deusdedit Nsimeki anayekwenda kuwa Kamanda wa Polisi Mkoa wa Manyara wakati aliyekuwa Kamanda wa Polisi Mkoa wa Manyara, Kamishna Msaidizi wa Polisi (ACP) Akili Mpwapwa anakwenda kuwa Kamanda wa Polisi Mkoa wa Ruvuma.

Wengine ni aliyekuwa Ofisa Mnadhimu Mkoa wa Lindi, Kamishna Msaidizi wa Polisi (ACP) Renatha Mzinga anakuwa Kamanda wa Polisi Mkoa wa Lindi, aliyekuwa Ofisa Mnadhimu Mkoa wa Dodoma, Kamishna Msaidizi wa Polisi (ACP) Suzan Kaganda  anakwenda kuwa Kamanda wa Polisi Mkoa wa Tabora na aliyekuwa Kamanda wa Polisi  Mkoa wa Tabora, Kamishna Msaidizi wa Polisi (ACP) Peter Ouma amehamishiwa Makao Makuu ya Polisi.

Kwa mujibu wa taarifa hiyo, wengine waliohamishwa ni aliyekuwa Mkuu wa Upelelezi  Mkoa wa Mtwara, Kamishna Msaidizi wa Polisi (ACP) Eliyakimu Masenga anakwenda kuwa Mkuu wa Upelelezi Kikosi cha Tazara.

Aliyekuwa Mkuu wa Upelelezi Mkoa wa Tabora, Kamishna Msaidizi wa Polisi (ACP) David Mnyambuga anakwenda kuwa Mkuu wa Upelelezi Mkoa wa Ilala na aliyekuwa Mkuu wa Upelelezi Mkoa wa Ilala, 

Kamishna Msaidizi wa Polisi (ACP) Juma Bwire anakwenda kuwa Ofisa Mnadhimu Mkoa wa Tabora.

Aidha, aliyekuwa Ofisa Mnadhimu Mkoa wa Tabora, Mrakibu Mwandamizi wa Polisi (SSP) John Kauga anakuwa Mkuu wa Upelelezi Mkoa wa Tabora, aliyekuwa Mkuu wa Polisi wa Wilaya ya Rombo,  Mrakibu 

Mwandamizi wa Polisi (SSP) Ralph Meela anakwenda kuwa Mkuu wa Upelelezi Mkoa wa Mtwara na aliyekuwa Mkuu wa Upelelezi wa Kikosi cha Tazara, Mrakibu wa Polisi (SP) Isack Msengi anakwenda kuwa Kaimu Mkuu wa Upelelezi Mkoa wa Pwani.

Kwa upande wa wakuu wa Polisi wa mikoa wa Usalama Barabarani  waliohamishwa ni aliyekuwa Mkuu wa Trafiki Mkoa wa Kinondoni, Mrakibu Mwandamizi wa Polisi (SSP) Ibrahim Mwamakula anahamia Trafiki Kanda Maalumu Dar es Salaam.

Aliyekuwa Mkuu wa Polisi wa Wilaya ya Mtwara, Mrakibu wa Polisi (SP) Awadh Haji  anakwenda kuwa Mkuu wa Trafiki Mkoa wa Kinondoni na Mrakibu wa Polisi (SP) Ezekiel Kiko Mgeni aliyekuwa ofisi ya RPC Temeke, anakuwa Mkuu wa Trafiki Mkoa wa Temeke.

Wengine ni aliyekuwa Mkuu wa Trafiki Mkoa wa Lindi, Mrakibu wa Polisi (SP) James Kiteleki anakwenda kuwa Mkuu wa Trafiki Mkoa wa Njombe, aliyekuwa Mkuu wa Trafiki Mkoa wa Ilala, Mrakibu wa Polisi (SP) Meloe  Buzema anakwenda kuwa Mkuu wa Trafiki Mkoa wa Lindi, aliyekuwa Kaimu Mkuu wa Trafiki Mkoa wa Temeke, Mrakibu Msaidizi wa Polisi  (ASP) Prackson Kibogoyo anakwenda kuwa Mkuu wa Operesheni Mkoa wa Pwani na aliyekuwa Mkuu wa Trafiki Mkoa wa Njombe,   Mrakibu Msaidizi wa Polisi (ASP) Chacha Nsaho Maro anakwenda kuwa Mkuu wa Trafiki Mkoa wa Ilala.

Taarifa hiyo ilieleza kuwa mabadiliko hayo ni ya kawaida kwa mujibu wa kanuni, taratibu na miongozo ya Jeshi la Polisi katika kuhakikisha wananchi wanaendelea kupata huduma bora ya usalama.