WAKATI PHIRI AMETUA DAR, ANGALIA LOGA ALIVYOIAGA DAR ES SALAAM

Wakati Kocha mpya wa Simba, Patrick Phiri raia wa Zambia ametua nchini, angalia aliyekuwa kocha wa timu hiyo, Zdravko Logarusic alivyoliaga jiji la Dar.

Kupitia mtandao wa Facebook, Loga ametupia picha mbili huku akiandika “by by Tanzania), akimaanisha bye bye Tanzania.

UONGOZI wa Simba umeamua kumfukuza kazi aliyekuwa kocha mkuu wa timu hiyo, Zdravko Logarusic, lakini kocha huyo ameondoka na kitita cha Sh56 milioni kwa muda wa wiki tatu pekee tangu aliposaini mkataba mpya klabuni hapo bila kufanya kazi yoyote ya maana.

Logarusic amechukua kitita hicho akiwa ameiongoza Simba kwenye mechi moja tu ya kirafiki dhidi ya Zesco ya Zambia ndani ya muda huo ambapo Simba ililala kwa mabao 3-0.

Kwanza Julai, 22 mwaka huu, kocha huyo alisaini mkataba wa mwaka mmoja wa kukinoa kikosi hicho cha Simba ambapo alichukua Dola 24, 000 (Sh 39.7 milioni) za ada ya kusaini mkataba huo.

Pili kocha huyo alipokea mshahara wa mwezi mmoja aliofanya kazi ambao ulikuwa ukamilike wiki ijayo na pia amepokea mshahara wa mwezi mmoja wa bure ili kuvunja mkataba wake.

Hivyo kocha huyo amepokea jumla ya dola 10,000 (Sh 16.5 milioni) za mishahara yake ya miezi miwili klabuni hapo. Jumla ya fedha hizo ni Sh56milioni.

Mbali na fedha hizo alizoondoka nazo, kocha huyo aliiongoza Simba kushika nafasi ya pili ya Kombe la Mapinduzi mapema mwaka huu. Simba ilitinga fainali ya michuano hiyo ambapo ilipoteza kwa bao 1-0 mbele ya KCCA ya Uganda.

Katika rekodi nyingine Logarusic aliiongoza Simba katika mechi 13 za Ligi Kuu Bara, Simba ilishinda mara tatu pekee.

Ilipoteza michezo mitano na kutoka sare mitano na kumaliza nafasi ya nne. Logarusic aliikuta Simba katika nafasi hiyo hiyo ya nne wakati anakabidhiwa timu Desemba mwaka jana kwa mkataba wa kwanza.