TAMBWE ATUA OFISINI KWA AVEVA, WAMALIZANA SAAFI

Mfungaji bora wa Ligi Kuu Bara msimu uliopita, Amissi Tambwe, ametua ofisini kwa Rais wa Simba, Evans Aveva na kukaa kwa zaidi ya saa moja.

Tambwe, raia wa Burundi, alitua ofisini kwa Aveva katika eneo la Posta jijini Dar es Salaam na kukaa ndani wakizungumza kwa zaidi ya saa moja.

Baadaye ilielezwa, Tambwe na Aveva walikutana baada ya mwaliko wa rais huyo aliyemwambia Mrundi huyo afike kwa ajili ya mazungumzo.

Juhudi za kutaka kujua nini kilizungumzwa zilikuwa na ugumu kwa kuwa Tambwe alikataa kuzungumza chochote wakati Aveva hakupokea simu ya mkononi.

Taarifa za ndani zinaeleza kwamba, Aveva alizungumza na Tambwe na kumueleza Simba haina mpango wa kumuacha kama ambavyo imekuwa ikielezwa.

“Hata hivyo, rais alimtaka Tambwe kuongeza juhudi, pia kuusikiliza uongozi badala ya zile taarifa ambazo amekuwa akizisikia kupitia kwa mashabiki, wanachama au vyombo vya habari.

“Hivyo, amemtaka ajitume kwa ajili ya kuisaidia Simba kwa kuelekeza nguvu zake kwenye timu badala ya kuingia hofu,” kilieleza chanzo.

Tambwe amefunga bao moja tu hadi sasa, alikuwa katika hofu kubwa kutokana na taarifa kama ataachwa kutokana kukosa nafasi ya kutosha uwanjani. 
CHANZO: SALEH JEMBE BLOG