Wafanyabiashara Kariakoo walia ucheleweshaji mizigo.

JUMUIYA ya Wafanyabiashara wa Kariakoo (JWK) wamewataka Waziri wa Viwanda na Biashara, Dk. Abdallah Kigoda na Waziri wa Uchukuzi, Dk. Harrison Mwakyembe kuwasaidia kutatua tatizo la kodi na ucheleweshwaji wa mizigo unaofanywa na mawakala.

Akizungumza katika kikao cha dharura kilichofanyika jijini Dar es Salaam jana, Mwenyekiti wa jumuiya hiyo, Mathias Makoyi, alisema tatizo la kuzuiwa kwa makontena yao na ushuru wa forodha kuwa mkubwa vimewafanya wafanyabiashara wengi kushindwa kulipa marejesho waliyokopa benki.

Makoyi alisema tatizo hilo limewakumba kwa kipindi cha miezi miwili sasa, na kwamba limesababisha umauti kwa wafanyabiashara walioshindwa kutoa mizigo yao na kufilisiwa na benki.

Katibu wa chama hicho, Sued Hamisi, alisema tatizo lililopo ni kati ya mawakala na waagizaji wa mzigo kutokana na baadhi ya mawakala kukwepesha kodi, hali iliyosababisha wafanyabiashara wa nchi jirani kukimbia.

“Tulitaka kuandamana na kufunga maduka yote lakini tukaona njia sahihi ni mazungumzo, hivyo tunawaomba viongozi wetu watusaidie hili tatizo liishe maana tunafilisika na mikopo inatudai,” alisema.