Wamachinga Iringa wasalimu amri

HATIMAYE wafanyabiashara ndogondogo (Wamachinga) wamekubali kufanya biashara katika eneo la Mlandege walikohamishiwa na Halmashauri ya Manispaa ya Iringa kutoka eneo la Mashine Tatu.

Wiki iliyopita Wamachinga hao walifanya vurugu kubwa kupinga kuondolewa katika eneo la Mashine Tatu walilodai lina wateja wengi zaidi.

Vurugu hizo zilisababisha mbunge wa Iringa Mjini, Mchungaji Peter Msingwa, na Wamachinga 70 kushtakiwa kwa kuharibu mali na uchochezi.

Baadhi ya Wamachinga waliozungumza na Tanzania Daima, walisema wameamua kuondoka katika eneo la Mashine Tatu baada ya kubaini hawatoweza kuendeleza mivutano na vyombo vya dola vinavyowazuia wasifanye biashara zao.

Walibainisha kuwa vurugu zilizotokea wiki iliyopita zilichangiwa na baadhi ya watu ambao si wafanyabiasahara ndogondogo bali waliutumia mwanya huo kutimiza mahitaji yao.

Wakati huohuo, jeshi la polisi mkoani Iringa juzi na jana lilizidisha ulinzi kwenye maeneo mbalimbali pamoja na kuwakamata baadhi ya watu waliokuwa wakitoa kauli za kichochezi katika vijiwe mbali mbali.

Huku askari wa Kikosi cha Kutuliza Ghasia (FFU) kwa mara ya kwanza usiku wa kuamkia leo walionekana wakiweka ulinzi mkali katika maeneo mbalimbali ya mji likiwemo eneo la soko la Kihesa, Mlandege, Mashine Tatu na maeneo mengine.

Naye Mkuu wa Mkoa wa Iringa, Dk. Christine Ishengoma, amewapongeza Wamachinga kwa kurejea eneo la Mlandege walilopangiwa na uongozi wa manispaa ya Iringa.