‘Hatuamini ufufuko wa mtoto’.

JESHI la Polisi mkoani Geita limethibitisha kuonekana kwa mtoto Shabani Maulidi, anayedaiwa kufufuka baada ya miaka mitatu ya kifo chake, kilichosababishwa na kutumbukia kisimani mwaka 2011.

Akizungumza na waandishi wa habari ofisini kwake, Kamnda wa jeshi hilo, Leonard Paulo, alisema kuwa pamoja na kuthibitisha tukio la kuonekana kwa mtoto huyo akiwa hai bado serikali haiamini kama ni kweli alikufa na kufufuka.

“Mimi kama kamanda wa polisi na serikali kwa ujumla, hatuamini kama mtoto huyu alikufa na kufufuka, japo wazazi wake wanakiri hilo. Serikali haiamini vitu kama hivyo,” alisema.

Naye Mganga Mfawidhi wa Hospitali ya Wilaya ya Geita ambapo mtoto huyo alilazwa kwa matibabu, alisema kuwa hali yake inaendelea vizuri na wakati wowote ataruhusiwa.

Hata hivyo, Jeshi la Polisi linaendelea na uchunguzi ili kubaini ukweli juu ya tukio hilo kwa kushirikiana na wataalamu kutoka hospitali ya wilaya, ambapo kwa sasa hatua inayoendelea ni kutafuta vipimo vya vinasaba (DNA).

Katika tukio jingine, mtoto wa miezi miwili, Edga Sizya, amefariki dunia papohapo baada ya kupigwa kichwani eneo la paji la uso na baba yake mzazi, Sizya Kilulinda (35) mkazi wa Bugurula.

Kamanda huyo alisema kuwa tukio hilo lilitokea Septemba 28, mwaka huu, baada ya kutokea ugomvi kati ya baba na mama wa mtoto huyo, Kulwa Lukas (27) kwa kile alichodai kuwa ni mke kupika ugali wa muhogo.

Alisema kuwa hatua hiyo ilizua ugomvi, ambapo baba wa marehemu Kilulinda aliruka na kumpiga kichwa mkewe na bahati mbaya kichwa hicho kilimpata mwanaye kwenye paji la uso akiwa amebebwa mgongoni na mama yake.

Kufatia tukio hilo, wananchi waliamua kumpiga Kalulinda na kupoteza maisha na kwamba Jeshi la Polisi linaendelea na uchunguzi.