Utata manispaa ya Kinondoni baada ya kutakiwa kulipa sh 695,520,000 kwa waliokuwa wakazi wa Magomeni Kota.

HALMASHAURI ya Manispaa ya Kinondoni imejikuta njia panda baada ya kutakiwa kulipa sh 695,520,000 kwa waliokuwa wakazi wa Magomeni Kota ikiwa ni pango la kodi kuanzia Januari hadi Desemba mwaka huu.

Halmashauri hiyo iliingia mkataba na wakazi hao Septemba mwaka 2011 katika Mahakama Kuu Kitengo cha Ardhi ambapo ilikubali kuwalipia pango la chumba wakazi hao kuanzia mwaka huu hadi pale nyumba za eneo hilo zitakapokamilika.

Akizungumza na Tanzania Daima Jumatano, mmoja wa watendaji wa halmashauri hiyo ambaye hakupenda jina lake litajwe, alisema kuwa malipo hayo yamesababisha migongano baina ya viongozi wa manispaa na baraza la madiwani.

Alisema kuwa kuliibuka mvutano mkubwa katika kikao cha baraza la wadiwani ambapo baadhi walipinga mkataba huo na wameshauri malipo hayo yasitishwe ili hatua za kisheria zichukuliwe.

“Hivi ninavyokwambia kuna sintofahamu juu ya malipo hayo maana wakazi hao wana mkataba halali unaotambuliwa na mahakama na hata baraza la madiwani linafahamu hilo ndiyo linajaribu kupigania mkataba huo uvunjwe ili fedha hizo zitumike kwa shughuli nyingine,” alisema.

Alisema kuwa mbali na baraza la madiwani wapo watendaji wa juu wa halmashauri hiyo ambao nao hawakubaliani na mkataba huo na kutaka uvunjwe kwa kuwa sio busara kwa manispaa hiyo kuwalipia pango wakazi wake.

Hata hivyo akizungumza na gazeti hili jana kiongozi wa kamati ya wakazi hao, Abbas Mkweta, alisema kuwa halmashauri inapaswa kutambua na kuuthamini mkataba waliosaini na wakazi hao juu ya kuwalipia malipo hayo.

Mkweta alisema kuwa halmashauri ilipaswa kuwa imelipa malipo hayo tangu Januari mwaka huu lakini ikatoa udhuru na kuomba kulipa fedha hizo ifikapo Septemba mwaka huu.

“Hapa tulipo tunaendelea na uhakiki wa majina ya waliokuwa wakazi wa eneo hilo na zoezi hilo lilianza juzi na linakamilika leo,” alisema.

Alisema kuwa mkataba huo ni halali na ni makubaliano yaliyofanyika kisheria hivyo hakuna haja ya watendaji wa halmashauri hiyo kusigana juu ya malipo hayo.

Mkweta aliongeza kuwa manispaa hiyo ilijizatiti kulipa malipo hayo iwapo itashindwa kukamilisha ujenzi wa nyumba katika eneo hilo ili kuwawezesha kuingia katika nyumba hizo.

“Sasa kama nyumba walizosema wanajenga hazijakamilika na mkataba unaitaka halmashauri itulipie kodi wanachopinga nini wakati hayo ni makubaliano…tulikubaliana sisi tupewe kipaumbele katika nyumba hizo kama zingekamilika na tungekuwa tunalipa kodi ya sh elfu 90,000 kwa mwezi na kwa mwaka tulipaswa kulipa sh milioni 1,080,000,” alisema.

Alisema kuwa wakazi hao hawana haja na fedha hizo wanachohitaji ni halmashauri hiyo kutekeleza makubaliano ya kujenga nyumba hizo ili waweze kupanga na kuondokana na usumbufu.

Nyumba  za magomeni kota zilijengwa  na jiji la Dar miaka ya 1950 na baadaye kumilikishwa kwa halmashauri ya manispaa hiyo.

Nyumba hizo zilipangishwa kwa mkataba  kwa wakazi hadi mwaka 2006. Wakazi hao 644 waliendelea kukaa hapo hadi 2009 ambapo walitakiwa  kuondolewa na wakakimbilia mahakamani.

CHANZO TANZANIA DAIMA