Polisi waua wawili Arusha

WATU wawili wanaodhaniwa kuwa ni majambazi wameuawa na polisi mkoani Arusha wakati wakirushiana risasi huku wengine wanne wakifanikiwa kutoroka.

Tukio hilo limetokea juzi saa 2:15 usiku kwenye Kijiji cha Makisoro, Kata ya Akheri wilayani Arumeru, ambapo baada ya kuuawa majambazi hao ambao majina yao hayajafahamika, polisi walichukua bunduki waliyokuwa wakiitumia aina ya Mark IV yenye namba 5903629B ikiwa na risasi tisa.

Kamanda wa polisi mkoani hapa, Liberatus Sabas, aliwaeleza waandishi wa habari jana kuwa miili ya marehemu hao ambao wote ni wanaume imehifadhiwa kwenye hospitali ya mkoa ya Mount Meru.

Akielezea tukio hilo, Kamnda Sabas alisema kuwa polisi wakiwa kwenye doria ya kawaida walipita eneo hilo ambapo waliwaona watu hao na kuwatilia shaka hivyo kuamua kuwahoji ndipo ghalfa watu hao wakaanza kuwarushia polisi risasi.

Alisema kuwa polisi nao waliamua kujibu ndipo watu hao wawili wakauawa huku wengine wanne wakifanikiwa kukimbia ambapo uchunguzi wa kuwabaini majina ya waliokufa na waliokimbia unaendelea.

Katika hatua nyingine jeshi hilo limefanikiwa kukamata watu 17 wakiwemo watano wanaotuhumiwa kujihusiasha na ujambazi wa kutumia silaha.

Habari  Grace Macha, Arusha