Mwalimu, muuguzi wafumaniwa chooni

KATIKA hali isiyokuwa ya kawaida, mwalimu mstaafu na mwanamke mmoja ambaye ni muuguzi juzi walifumaniwa wakifanya mapenzi katika moja ya vyoo vya Qman Grosary iliyopo mjini Geita.

Mwalimu huyo mstaafu ambaye amewahi kufundisha katika Shule ya Msingi Nyamalembo, Kata ya Mtakuja na mwanamke huyo ambaye ni muuguzi katika Hospitali ya Wilaya ya Geita (majina yanahifadhiwa) walifumaniwa baada ya kutiliwa shaka na baadhi ya wananchi waliokuwa wakipata vinywaji katika grosary hiyo.

Mmoja wa wafanyakazi wa grosary hiyo ambaye hakutaka jina lake liandikwe  alidai kuwa wawili hao walifika eneo hilo majira ya mchana kwa lengo la kupata kinywaji.

Alisema kabla ya wawili hao kufanya uzinzi huo, walianza kufanya vitendo vya aibu ikiwa ni pamoja na kunyonyana ndimi, jambo lililowachefua baadhi ya wanywaji, hatua iliyomfanya awasihi kuondoka na kutafuta sehemu ya kupumzika.

“Nilipowaona wamezidisha kufanya ufedhuli huo niliwasihi watafute sehemu ya kupumzika kufanya mambo yao na si hadharani kama wanavyofanya, lakini juhudi zangu hazikuzaa matunda, kwa kuwa hawakukoma,” alisema mfanyakazi huyo.

Badala yake, aliwaona wawili hao wakiongozana kuelekea chooni mithili ya watu wanaokwenda kujisaidia lakini walikawia kurudi na baada ya kufuatilia aligundua kuwa walikuwa wakifanya mapenzi kwenye choo.

Mwalimu huyo alipohojiwa na mwandishi wa habari hizi alijitetea akidai kuwa hakujua akitendacho na kwamba ilikuwa ni kwa sababu ya kulewa mno.

Hata hivyo, alimtishia mwandishi wa habari hizi akimwonya kutoandika tukio hili akidai vinginevyo angemdhuru.

“Hiyo ilikuwa pombe na wala mimi si wa kwanza kufanya hivyo, hivyo iwapo unataka kuishi katika umri ambao Mungu amekupangia nakuomba uachane na habari hiyo, mimi ni komando na ikitoka uombe niamke nimekufa,” alisema mwalimu huyo.

Naye muuguzi huyo alijitetea kuwa alilazimishwa kufanya kitendo hicho na mwalimu huyo baada ya kumdanganya amsindikize chooni na walipofika alifunga mlango na kisha kumvua nguo na kumuingilia kwa nguvu, akidai aliogopa kutoa taarifa polisi kuhofia ndoa yake kuvunjika.