Pillay : Haki za Wanawake lazima ziheshimiwe

Kamishna wa Haki za Binadamu wa Umoja wa Mataifa amezitaka nchi zote ulimwenguni kufanya juhudi maradufu za kuhakikisha kwamba wanawake wanapewa haki zao. Akizungumza mjini Geneva kwa mnasaba wa kuwadia siku ya kimataifa ya wanawake, Navi

 

Pillay amesema kuwa, nchi zote duniani zinapaswa kusimama kidete na kukabiliana na ukandamizaji unaofanywa dhidi ya wanawake duniani. 

Akielezea wasiwasi wake kuhusiana na ukandamizaji dhidi ya wanawake uliofanywa hivi karibuni katika baadhi ya nchi ulimwenguni, Pillay ameongeza kuwa, viongozi wa serikali pamoja na wakuu wa vyombo vya mahakama katika nchi mbalimbali duniani wanapaswa kuonyesha hisia zao zaidi dhidi ya ukandamizaji, udhalilishaji wa kijinsia na ubakaji dhidi ya wanawake, na kusisitiza kwamba wahalifu wanapaswa kuchukuliwa hatua kali. 

Duru za Kimarekani zimeeleza kuwa, katika kila dakika mbili, mwanamke mmoja wa Kimarekani hunajisiwa na zaidi ya nusu ya wahanga wa vitendo hivyo ni wasichana waliokuwa na umri wa chini ya miaka 17.  Siku ya kimataifa ya wanawake huadhimishwa tarehe 8 Machi ya  kila mwaka.