Madiwani Mbeya wamkataa mkurugenzi

BARAZA la Madiwani Wilaya ya Kyela, mkoani Mbeya, limepiga kura ya kutokuwa na imani na Mkurugenzi Mtendaji wa Halmashuri hiyo Abdallah Mfaume kutokana na tuhuma za kutoa zabuni ya ujenzi wa daraja la Lusungo kwa kamapuni hewa.

Mwenyekiti wa Halmshauri ya Wilaya, Gabriel Kipija, alisema halmashauri hiyo ilitangaza zabuni ya ujenzi wa daraja na kampuni zilizoshindaniwa ni tano na kampuni iliyopita ni Ms China International Construction Campany ambayo ilipendekezwa na mkoa. Alisema kuwa baada ya kampuni hiyo kupita, mkurugenzi alipitisha kampuni ambayo haikuchaguliwa na mkoa ambayo ni Ms CMG Construction Company Limited ya jiji Mwanza kinyume na taratibu.

Alisema baada ya minomg’ono kutawala mitaani kwamba madiwani wamehusika kupokea rushwa, ili kupitisha kampuni isiyo na sifa, baraza hilo liliunda tume ya uchunguzi na kubaini kuwa kampuni hiyo ya Mwanza imepewa zabuni kujenga daraja hilo wakati mkoa uliipitisha kampuni ya China kutoka Dar es es Salaam.

Hata hivyo, mwenyikiti alisema licha ya kubaini hilo waliamua kusafiri hadi Dar es Salaam PPRA kuchunguza uhalali wa kampuni hiyo na kubainika kuwa kampuni hiyo haipo ndipo walipoitisha kikao cha kamati ya fedha, ili kuitisha kikao cha dharura. Baada ya kikao hicho, madiwani 24 walipiga kura ya kutokuwa na imani na mkurugenzi na madiwani wanne walipiga kura ya kuwa na imani na mkurugenzi huyo wakidai kuwa tatizo la daraja hilo lilikuwepo tangu wakati wa mkurugenzi aliyeondoka, Sinyagwa Mhando.

Akizungumzia tuhuma hizo, Mfaume alizipinga na kusema kwanza kikao hicho ni batili, kwani wamefanya kinyume na kanuni.

Alisema endepo kuna tuhuma hizo, mwenyekiti alipaswa kupeleka taarifa kwa mkuu wa wilaya na kisha kwa mkuu wa mkoa ambaye angeunda tume ya kumchunguza, lakini si kama alivyofanya.

“Hizi ni chuki binafsi za mwenyekiti wa halmashauri dhidi yangu na hii ni baada ya bodi ya zabuni kuikataa kampuni ya Ms China Charging Instruction Construction Campanies ya kujenga daraja hilo ambayo hata hivyo ilionyesha kupigiwa debe na timu ya tathmini ya mkoa ilionyesha dhahiri mwenyekiti alikuwa na maslahi nayo,” alisema.

Alisema baada ya serikali kutoa fedha za kujenga daraja hilo, bodi ya zabuni ya wilaya ilitangaza zabuni na makampuni yaliyoomba yalikuwa matano lakini matatu yaliondolewa na kubaki mawili.

Alisema baada ya kubaki kampuni ya Kichina na kampuni kutoka Mwanza ndipo mvutano ulipoanza kati timu ya tathmini kutoka mkoani na bodi ya zabuni ya wilaya ikipendeza kampuni yake.

Mkurugenzi huyo alisema baada ya kuona mvutano huo kumuandikia Ofisa Mtendaji Mkuu wa PPRA Makao Mkuu, Dar es Salaam, kwa ajili ya kutolea maamuzi, lakini majibu hayajatolewa ameshangaa kuhusishwa na tuhuma hizo.

Hata hivyo, mkurugenzi huyo alibainisha baadhi ya sababu za bodi ya zabuni ya wilaya kuikataa kampuni ya Kichina ni kwamba kampuni hiyo ndiyo inayolalamikiwa kutengeza barabara za jiji Mbeya iliyofadhiliwa na Benki ya Dunia chini ya kiwango na kuwa barabara hizo zinatakiwa kujengwa tena kwa mara pili.