Mvua yaharibu barabara ya Msata-Bagamoyo.

MVUA zinazoendelea kunyesha wilayani Bagamoyo, Pwani, zimesababisha uharibifu mkubwa katika barabara ya Msata–Bagamoyo, katika eneo la bonde la mpunga na kusababisha magari kushindwa kupita.

Akizungumza na waandishi wa habari waliofika eneo la tukio kushuhudia hali halisi, mwishoni mwa wiki, Meneja wa TANROADS Mkoa wa Pwani, Tumaini Salakikya, aliwataka madereva na wananchi wanaotoka maeneo ya barabara ya Msata- Chalinze na wanaotoka Bagamoyo mjini kutoitumia barabara hiyo hadi maji yatakapokauka na barabara kufanyiwa ukarabati.

Alisema kwa sasa wanatakiwa kutumia barabara mbadala ya Mapinga-Vikawe hadi Tamco na Dar es Salaam -Chalinze –Segera.

Aidha alikemea vijana wanaoendelea kufanya biashara za kuvusha watu kwa malipo ya kati ya sh 1,000 hadi 3,000 kwani ni hatari kutokana na kutumia kifusi kilichowekwa kutokuwa salama kwao.

Mkuu wa Wilaya ya Bgamoyo, Ahmed Kipozi, aliyefika eneo hilo aliwasihi wananchi kuacha kung’oa vibao vinavyoonyesha alama ya kufungwa kwa barabara hiyo na kudai haina msingi kwa maisha ya watu.

Naye Kamanda wa Polisi Mkoa wa Pwani, Aurich Matei, alisema wanafanya jitihada za kuelimisha watu kutumia njia mbadala zilizotajwa na kuweka ulinzi, ili kuepusha madhara.

Barabara ya Msata-Bagamoyo ina urefu wa kilomita 64 ambayo ujenzi wake umefikia asilimia 90 inatarajiwa kuwa barabara kuu ya kupitisha magari yatokayo na kwenda mikoa ya ukanda wa kaskazini kutoka Dar es Salaam. Inajengwa na kampuni ya M/S Estim Contruction Company na kusimamiwa na M/S H.P Gauff Injeneure GMBH and Company kutoka Ujerumani kwa gharama ya sh bilioni 89.6.