Shule ya vigogo yatimiza miaka 50

WALIOKUWA wanafunzi wa Shule ya Sekondari ya wasichana Weruweru iliyopo Kilimanjaro kwa kushirikiana na bodi ya shule hiyo wameandaa sherehe za maadhimisho ya miaka 50 ambayo yatafanyika Septemba 21, mwaka huu.

Akizungumza na waandishi wa habari jana, Mwenyekiti wa kamati ya maadhimisho hayo, Mwanaidi Maajar, alisema kuwa maadhimisho hayo yatafanyika sambaba na uchangishaji wa fedha za ukarabati wa majengo yaliyoharibika pamoja na ujezi wa bweni jipya.

“Katika ziara ya kutembelea Shule ya Weruweru hivi karibuni ilidhihirika kwamba majengo ya shule hiyo yenye miaka 50, yamechakaa, hivyo basi ili kurejesha heshima ya mama mlezi kama sehemu ya maadhimisho Wana Weruweru wataanzisha chama chao kwa kuzindua mfuko maalumu wenye lengo la kuchangisha fedha kwa ajiri ya kurejesha hadhi ya shule yetu hiyo ili iendane na karne ya 21, ” alisema.

Mwanaidi aliongezea kuwa, zinahitajika sh milioni 500 kwa kuanzia, ili kufanikisha ukarabati wa majengo ya shule hiyo, pamoja na ujenzi wa jengo jipya la bweni..

Hata hivyo, tayari Wana Weruweru wameishaanza kuchangia, hivyo aliwaomba marafiki na wapenda maendeleo ya elimu kujitolea kudhamini kwa kutangaza katika Jarida Maalumu la miaka 50 ya Weruweru kwa michango, ama kwa kununua kanga au kwa kutuma fedha kwa kutumia namba 0713 213 771 Tigo, 0763 475 506 Voda na 0786 213 771 Airtel.

Maadhimisho hayo yatakutanisha wageni takriban 2,500 wakiwamo viongozi mbalimbali wa serikali, wanafunzi na wazazi na mgeni rasmi katika sherehe hizo ni Waziri Mkuu, Mizengo Pinda.