Msafara wa Mwenge wapata ajali

ZAIDI ya watu 15, wakiwamo waandishi wa habari, jana wamenusurika kifo baada ya magari matatu yaliyokuwa kwenye msafara wa Mwenge wa Uhuru, kugongana wilayani Bunda, mkoani Mara.

Katika tukio hilo, magari mawili yameharibika vibaya, likiwamo la Taasisi ya Kuzuia na Kupambana na Rushwa (TAKUKURU) ambalo ndani yake walikuwamo waandishi wa vyombo mbalimbali vya habari, akiwamo mwandishi wa habari hizi ambao walipata majeraha kiasi.

Mashuhuda wa tukio hilo wamesema chanzo cha ajali ni mwendo kasi, ambapo gari moja mali ya halmasauri ya wilaya lenye namba za usajili SM 8809, lililigonga kwa nyuma gari la TAKUKURU lenye namba za usajili T 645 BCT.

Hali hiyo ilisababisha magari mengine likiwamo la TRA lenye namba za usajili STJ 9663 kugongana na kuacha njia na bila juhudi za madereva wa magari mengine kufanya jitihada za makusudi kwa kuacha barabara na kuingia upande mwingine huenda ajali hiyo ingesababisha madhara makubwa.

Polisi wilayani hapa wamethibitisha kutokea kwa ajili hiyo na kusema ilitokea majira ya jioni katika Kijiji cha Kasahunga, kwenye barabara kuu ya Bunda-Ukerewe, wakati msafara huo wa Mwenge huo ukielekea kwenye mkesha katika Kijiji cha Kibara, baada ya kuzindua na kuweka mawe ya misingi kwenye  miradi tisa ya maendeleo iliyogharimu zaidi ya sh bilioni 1.4.