Mwandishi Mbogora afariki

MHARIRI wa siku nyingi, Alfred Mbogora na Ofisa Habari wa Baraza la Habari Tanzania (MCT), amefariki dunia jana alfajiri katika Hospitali ya Taifa ya Muhimbili jijini Dar es Salaam.

Kwa mujibu wa taarifa iliyosambazwa jana kwa vyombo vya habari na Katibu wa Jukwaa la Wahriri Tanzania (TEF), Neville Meena, marehemu alilazwa katika hospitali hiyo kwa takriban siku tatu.

 

Taarifa hiyo ya TEF, ilibainisha kuwa Katibu Mtendaji wa MCT, Kajumbi Mukajanga amesema Mbogora alilazwa Muhimbili tangu Agosti 14 baada ya kuanguka katika eneo la Tegeta, mara baada ya kupata chakula wakiwa njiani kwenda Bagamoyo kwa shughuli za kikazi.

Mukajanga alibainisha kuwa kabla ya kuanguka, Mbogora alikuwa akilalamika kwamba anasikia kuishiwa nguvu kwenye mguu na mkono na alipojaribu kusimama ili kutembea kutokana na hali aliyokuwa akiisikia mwilini alianguka.

Tangu alipoanguka marehemu Mbogora alikata kauli na hakuweza kusema chochote hadi mauti yalipomfika jana alfajiri.

“Ni pigo kwa sekta ya habari nchini, kumpoteza mwanahabari mwenzetu ambaye ametoa mchango mkubwa katika sekta yetu ya habari,” alisema.

Wakati huo huo, Jukwaa la Wahariri Tanzania (TEF), limetoa pole kwa familia ya Mbogora, MCT na wanahabari wote nchini kutokana na kifo cha mwanahabari huyo mkongwe.