Wasanii waaswa wawe na umoja.

MDAU maarufu wa sanaa nchini, Allan Mmanyi ‘Captain Mupesa, amewataka wasanii wa fani zote nchini kuwa na umoja na mshikamano ili kufikia mafanikio yao.Mmanyi alitoa wito huo hivi karibuni jijini Dar es Salaam, ambapo alisisitiza kuwa, endapo wasanii wataungana, wataweza kufikia mafanikio kama ilivyo kwa wenzao wa nchi za Ulaya na Marekani.

Mdau huyo aliongeza kuwa, amekuwa akishangazwa na kuibuka kwa tabia ya wasanii kubaguana kutoka fani moja hadi nyingine.

Alilaani jambo hilo, kwani linaleta matabaka na kuitafuna sekta ya sanaa hapa nchini na bila kuungana, kamwe hawataweza kufikia malengo ya kukuza muziki na sanaa kwa ujumla hapa nchini.

“Wasanii wamekuwa na matabaka, kati ya wenye pesa na majina huku wale ambao hawana fedha, wakijikuta wamejikunyata kama watoto yatima, haipendezi kabisa,” alisema.

Aliongeza kuwa, hakuna ubishi wasanii hapa nchini, wamegawanyika kwa mtindo usio na tija kwa tasnia yao, jambo linaloashiria kuanguka au kukosa mwelekeo kwa biashara itokanayo na sanaa hapa nchini kama hawatajirekebisha.

“Ni aibu sana... wasanii ni watu wanaotakiwa kuwa mstari wa mbele kuhamasisha jamii juu ya mambo mema, huku umoja likiwa ni jambo kuu, lakini cha ajabu, siku hizi utakuta makundi ya mastaa wa filamu yamejitenga kwa mafungu mafungu, wenye hela wako tofauti na wasio nazo,” alisema Mmayi ambaye ni miongoni mwa wadau waliotoa ufadhili kwa wasanii wengi hapa nchini.

Aliongeza kuwa hata wasanii wa muziki wa Bongo fleva, nao wanafanya ujinga uleule wa kubaguana, kwani wapo wanaojiita wenye majina makubwa na wale ambao bado hawajakamata ‘chati’ kutokana na uchanga wao au kutopokewa vema na mashabiki