Ni kufa kupona kwa Kili Stars, Heroes leo.

TIMU ya soka ya Tanzania bara ‘Kilimanjaro Stars’, leo inashuka dimbani kuwania tiketi ya fainali ya Kombe la Chalenji dhidi ya wenyeji na mabingwa watetezi wa michuano hiyo, Uganda Cranes.

Wakati Bara ikitinga hatua hiyo kwa kuwang’oa Rwanda kwa mabao 2-0, Uganda wametokea kuwatupa nje ya michuano hiyo Ethiopia kwa kuwatungua bao 2-0.

 

Ni mechi inayotarajiwa kuwa yenye mvuto na ushindani mkubwa kutokana na rekodi ya timu hizo mbili, kwani Stars itashuka dimbani ikikumbuka kipigo cha mabao 3-1 zilipokutana kwenye hatua hiyo mwaka jana kwenye Uwanja wa Taifa, jijini Dar es Salaam. Uganda baadae iliifunga Rwanda kwa penalti 3-2 katika fainali baada ya kumaliza dakika 120 kwa sare ya 2-2.

 Akizungumzia mechi hiyo, Kocha wa Stars, Kim Poulsen amewasihi waamuzi kutenda haki hasa wakizingatia watakuwa wakicheza na bingwa mtetezi anayecheza nyumbani.

Wakati Uganda ikitaka kushinda ili kutinga fainali itakayochezwa Desemba 8 na kutetea taji lake, pia kuweka rekodi ya kulibeba mara 13 tangu 1973, Stars wanajaribu kuubeba ubingwa huo mara ya nne.

Akizungumza baada ya mazoezi ya jana kwenye Uwanja wa Chuo Kikuu Kyambogo, Poulsen alisema kwa kutambua yote hayo, timu yake inayodhaminiwa na Kampuni ya Bia Tanzania (TBL) kupitia Bia ya Kilimanjaro Premium Lager, vijana wake watapambana kushinda kutinga fainali.

“Vijana wamejiandaa vizuri kabisa na wote wako katika hali nzuri ya kucheza ila tunachoomba ni ‘fair play’ kutoka kwa mwamuzi maana tunacheza na wenyeji ambao wana watazamaji wengi,” alisema Poulsen.

Alisema timu zote mbili ni nzuri na kama mwamuzi atachezesha vizuri kwa haki, basi itakuwa ni mechi ya kuvutia.

“Vijana wana ari na mechi na kukiwa na ‘fair play’ tutacheza vizuri kama tulivyofanya dhidi ya Rwanda,” alisema Poulsen.

Mwamuzi wa mechi hiyo ni Mohamed El Fadil kutoka Sudan aliyechezesha mechi ya robo fainali kati ya Stars dhidi ya Rwanda.

Alisema faraja kwake ni kutokuwa na majeruhi huku akiwasifu nyota wake kwa kuonesha uwezo, nidhamu na mshikamano mkubwa akisema vitu hivyo ni muhimu kwa timu inayopigania ushindi.

“Hawa wanakaa kama familia, si unawaona walivyo pamoja?” alisema Poulsen na kuongeza kuwa, hilo ni muhimu sana kwa mchezaji.

Naye kocha msaidizi, Marsh Sylvester alisema Stars inayo nafasi kubwa ya kushinda mechi hii kutokana na wenyeji wao kusumbuliwa na presha ya mashabiki wao.

“Timu yetu iko ‘motivated’ kabisa na ukizingatia Uganda wako nyumbani, wao ndio wana ‘tension’ kubwa zaidi,” alisema na kuongeza kuwa mchezo huu utakuwa wa kusisimua sana.

Akizungumzia mechi ya leo kutoka Dar es Salaam, Meneja wa Bia ya Kilimanjaro, George Kavishe alisema Stars ina kila sababu ya kushinda na kutinga fainali kisha kutwaa ubingwa wa nne.

Mechi hiyo ya Stars na Uganda, itatanguliwa nyingine kati ya Zanzibar dhidi ya Kenya, inayaotarajiwa kuwa yenye ushindani mkubwa.

Kocha wa Zanzibar, Salum Nassor ametamka mara mbili kwamba kama Zanzibar itashindwa kuondoka na ubingwa, hataona sababu ya kuendelea kuinoa timu hiyo.

Mechi ya fainali na mshindi wa tatu wa michuano hiyo, zote zitachezwa Jumamosi ambapo bingwa ataondoka na kitita cha dola 30,000; mshindi wa pili dola 20,000 huku mshindi wa tatu akilamba dola 10,000 za Marekani.