Mwanaharakati afia gesti.

Na Berensi Alikadi-Tanzania Daima.
MWANAHARAKATI wa Haki za Binadamu Mkoa wa Mara, Eustace Nyaruganda (45) amekutwa amekufa katika nyumba ya kulala wageni (gesti).

Akizungumza na waandishi wa habari jijini Dar es Salaam jana Ofisa Shughuli wa Shirika la ABC Foundation, Andreas Migiro, alisema alipokea taarifa za msiba wa mkurugenzi wake jana asubuhi baada ya kupigiwa simu na meneja wa ofisi yao.

Migiro alisema alipewa taarifa kuwa mkurugenzi wao alikutwa jana asubuhi akiwa amekufa katika nyumba ya kulala wageni ijulikanayo kwa jina la Savana iliyoko Mtaa wa Benki mjini Bunda.

“Kwa kweli nimeshutushwa na kifo cha huyu mkurugenzi wetu maana ikumbukwe kuwa mwaka jana alipotea katika mazingira ya kutatanisha na baadaye alipatikana, na juzi tena alipotea na leo nimepata taarifa za kifo chake,” alisema Migiro.

Akizungumzia kifo hicho, Mratibu wa mtandao wa kutetea haki za binadamu nchini, Onesmo ole Ngulumwa, alisema wamepokea kwa masikitiko makubwa taarifa za kifo hicho na kwamba ni pigo kwa watetezi wa haki za binadamu.

Hata hivyo, baadhi ya wanaharakati wanaohudhuri mafunzo hayo wameonyesha kusikitishwa na mazingira ya kifo hicho ambapo wamesema kuwa hivi sasa maisha ya wanaharakati yako hatarini, hivyo ni lazima waishi kwa tahadhari.