Zima moto Ilala hoi.

HALI ya utendaji kazi katika kikosi cha zimamoto na uokoaji cha Ilala jijini Dar es Salaam, imezidi kuwa mbaya baada ya magari mawili yaliyokuwa yakitegemewa kufanya kazi kuharibika na kushindwa kufika kwenye matukio ya uokoaji.

Magari yaliyokuwa yakifanya kazi hadi juzi yalikuwa ni benzi lenye namba STK 1066 na STH 3856 aina ya Scania, ambayo yalishindwa kufika katika matukio ya moto uliotokea juzi eneo la Biafra na Mbagala Mbande, jirani na uwanja wa Azam, huku tukio lingine likiwa ni lile la jana asubuhi katika moja ya majengo ya usalama wa taifa Makumbusho.

 

Mbali ya magari hayo kuwa mabovu pia mawasiliano ya simu ya dharura ndani ya kikosi hicho ni ya kutia shaka, baada ya simu mbili kati ya tatu zilizokuwa zikitumika kupokelea taarifa za dharura kuharibika huku ile iliyobakia ufanyaji kazi wake ukiwa hauna uhakika.

Wakizungumza wafanyakazi wa jeshi hilo walisema taarifa za ubovu wa magari hayo wameshazifikisha kwa viongozi wao huku kukiwa hakuna jitihada za kushughulikiwa.

“Haya magari ni ya kanda ya Ilala ila yanatumika kwa ajili ya huduma kwa jiji zima kwa kuwa kanda zingine hazina magari na sasa yameharibika, unavyoyaona hapo hayana breki, ving’ora na vimuli-muli,” alisema mmoja wa wafanyakazi hao.

Aliongeza kuwa licha ya kutoa taarifa kwa uongozi juu ya ubovu wa magari hayo na vifaa vingine, wamekuwa wakilazimishwa wayatumie hivyo hivyo hali iliyosababisha moja ya magari hayo kutaka kugonga magari mengine kwa sababu ya kukosa breki wakati likijaribiwa kama linaweza kufanya kazi.

Mfanyakazi mwingine alisema hali hiyo ya ubovu wa vifaa haishii kwenye magari peke yake na kueleza kuwa hata simu ya ofisi kwa sasa haina uhakika wa kupatikana hewani na kuwafanya wafanyakazi wa kikosi hicho kutumia muda mwingi kupumzika katika vyumba vyao pasipo kufanya kazi.

“Hakuna umakini na uwajibikaji kwa viongozi wetu juu ya vifaa kwa maana hata tunapolala ni sehemu ya hatari kiafya magodoro yameisha, yananyofoka na hayana foronya huku viongozi wetu wakiwa wanakusanya fedha na kwenda kukaa vikao vya kupanga matumizi yatakayowanufaisha wao,” alisema mfanyakazi huyo.

Kamanda wa kikosi cha uokoaji na zimamoto mkoa wa Ilala (RFO) Athuman Nassa alipotakiwa kutolea ufafanuzi taarifa hizo alisema hawezi kuzungumzia suala hilo kwenye simu na kumtaka mwandisahi apange siku wakutane.