Watetezi Haki za Binadamu washauriwa kutorudi nyuma.

WATETEZI wa Haki za Binadamu wanaofanya shughuli zao katika maeneo ya migodi wametakiwa kutorudi nyuma katika kutetea haki za wanyonge kutokana na vitisho ambavyo wamekuwa wakipata wakati wa kufuatilia taarifa mbalimbali maeneo hayo.

Wito huo ulitolewa na Mratibu wa Mtandao wa Kutetea Haki za Binadamu (THRD-Coalition), Onesmo Olengurumwa, wakati wa uzinduzi wa ripoti inayoonyesha namna watetezi hao wanavyofanyiwa vitendo vya udhalilishwaji wanapohitaji taarifa katika migodi mbalimbali iliyopewa jina la ‘Only the Brave Talk About Oli’.

Olengurumwa alisema kutokana na kukabiliwa na hatari hiyo wamekuwa wakikutana mara kwa mara ili kupeana mbinu za namna ya kupata taarifa bila kudhurika.

Alisema ni muhimu jamii ifaidike na uchimbaji wa raslimali hiyo kwa kuwa ni haki yao Kikatiba hivyo wana wajibu wa kuzitetea, kuzifuatilia na kutoa maoni yao ya namna gani zitumike.

Naye Balozi Msaidizi wa nchi ya Sweden, Maria Van Berlekon, alisema changamoto ambazo zimekuwa zikiorodheshwa mara kwa mara na Watetezi wa Haki za Binadamu hapa nchini ni za ukweli na sio za kufikirika.

Van Berlekon ambaye nchi yake imedhamini uandaaji wa ripoti hiyo, alisema wangependa kuona fursa zilizopo katika migodi mbalimbali zinawafaidisha Watanzania na kuwepo kwa uwazi hasa katika suala zima la uingiaji wa mikataba.