Ajiua kwa kujikata koromeo

MKAZI wa Kijiji cha Nyankorongo wilayani Chato, mkoani Geita, Lameck Maraba (29), amejiua kwa kujikata koromeo baada ya kuhisi ana ugonjwa wa ukimwi muda mfupi baada ya kushauriwa na daktari kupima afya yake.

Tukio hilo limetokea usiku wa kuamkia juzi baada ya kijana huyo kushitushwa na ushauri wa daktari aliyemtaka kupima afya yake ili kubaini magonjwa yanayomkabili.

Mganga mfawidhi wa hospitali ya wilayani hapa, Pius Buchukundi alisema mgonjwa huyo alifika hospitalini hapo Januari 17, akisumbuliwa na homa ya matumbo, malaria na upungufu wa damu ambapo kutokana na hali hiyo alishauriwa kupima VVU.

Aliongeza kuwa kutokana na ushauri huo, aliingiwa hofu na kuamua kujikata koromeo na kusababisha kifo chake.

Pamoja na hilo, mganga huyo ametoa ushauri kwa wagonjwa wanaokwenda kutibiwa, wafuate ushauri unaotolewa na wauguzi ili kuepusha vifo visivyo vya lazima.

Jeshi la Polisi wilayani hapa limethibitisha kutokea kwa kifo hicho cha kusikitisha.