Hatima akaunti za TFF leo

HATIMA ya kuanza kwa raundi ya pili ya Ligi Kuu Bara iliyopangwa kuanza Januari 26, itajulikana leo katika kikao cha pamoja baina ya serikali, Shirikisho la Soka Tanzania (TFF) na klabu za Ligi Kuu zilizotishia kutocheza bila kupewa fedha za nauli.

Novemba mwaka jana, Mamlaka ya Mapato Tanzania (TRA), ilifunga moja ya akaunti za TFF, ambayo mdhamini wa Ligi Kuu Kampuni ya Vodacom, ilikuwa imeingiza fedha kwa ajili ya mzunguko wa pili wa ligi hiyo, kutokana na limbikizo la kodi za makocha wa kigeni kuanzia enzi za Mbrazil Marcio Maximo.

Baada ya kukwama kwa juhudi za TFF kutaka TRA irejeshe fedha hizo ili kuokoa Ligi Kuu, Januari 5, Naibu Waziri wa Habari, Vijana, Utamaduni na Michezo, Amos Makalla, alikutana na pande zote zinazohusika katika sakata hilo ambazo ni TRA, TFF na klabu, wakijadili pia utitiri wa makato kwenye Uwanja wa Taifa jijini Dar es Salaam.

Kikao hicho kilifanyika baada ya Klabu za Ligi Kuu kutaka zipatiwe fedha hizo hadi kufikia leo, walau kuwa na siku 10 za kujiandaa kabla ya kuanza kwa ligi hiyo, vinginevyo hawatacheza ligi hiyo.

Akizungumza na Tanzania Daima jijini Dar es Salaam jana, kuhusu hatima ya ligi hiyo kutokana na msimamo huo wa klabu, Mkurugenzi wa Mashindano wa TFF, Saad Kawemba, alisema raundi ya pili ya ligi hiyo itaanza siku hiyo kama ilivyopangwa awali, akiamini muafaka utapatikana kwenye kikao cha leo baina ya pande zote husika.

“Raundi ya pili ya Ligi Kuu itaanza kama ilivyopangwa Januari 26, tukiamini kikao cha kesho, kati ya pande husika, kitaisha kwa kupatikana muafaka ili kuepusha matatizo zaidi, kwani kupitia kikao chetu cha kwanza, serikali ilituelewa vizuri, tunaamini itakuja na majibu mazuri,” alisema.

Hoja kubwa ya TFF katika utetezi wao ni kuwa, kwa vile makocha wa kigeni wote wamekuwa wakilipwa na serikali, TRA haikupaswa kukamata akaunti ya shirikisho hilo, hatua ambayo inaweza kuleta matatizo makubwa katika soka kwa klabu kushindwa kusafiri.