Mwalimu akataa wanafunzi kwa utoro

MWALIMU Mkuu wa Shule ya Sekondari Ilkiding’a, iliyopo wilayani Arumeru, amewakataa wanafunzi waliochaguliwa kujiunga na kidato cha kwanza shuleni hapo wanaotoka katika shule za msingi za Kata ya Ilkiding’a kwa madai kuwa ni watoro na hawapendi kusoma.

Akizungumza katika kikao cha wazazi kilichofanyika shuleni hapo juzi, Mkuu huyo, Omary Nyangu, alisema hataki kuwapokea wanafunzi wanaotoka katika shule za msingi Kioga, Olturoto na Kiding’a, mara nyingi wanafunzi hasa wa kike wamekuwa wakiacha shule bila sababu na kufanya maendeleo ya shule kuzorota kutokana na takwimu kuyumba kila mwaka.

“Tatizo hili linachangiwa na wazazi ambao wamekosa maamuzi kwa watoto wao, hivyo kuwaacha wafanye lolote watakalo bila kujua kuwa wanaharibu malengo ya maisha yao ya baadaye,” alisema.

Mmoja wa wazazi waliohudhuria kikao hicho, Francis Elias, alisema uamuzi alioufanya mwalimu huyo ni wa busara, kwani wanafunzi wengi wanaotoka kata hiyo wamekuwa wakimaliza kidato cha nne na kupata sifuri, jambo linalowakatisha tamaa wazazi.

Aliwataka wazazi kuwaelimisha watoto wao juu ya changamoto za maisha zitakazowakabili wasipokuwa na elimu.