LAMANIA SHAABAN: ‘MBUYU’ WA TAARAB ULIOACHA SIMANZI

 Habari na Saluti 5 (www.saluti5.com)

HAKUWA mtu wa makuu na inawezekana wengi wakawa hawafamu uwezo wake wala sura yake …hakupenda kujikweza, lakini ni mtu mkubwa sana kwenye muziki wa taarab pengine kuliko yeyote unayemdhania wewe.

Marehemu Lamania Shaaban

Huyo ndie Lamania Shaaban aliyezikwa jana Tandika, Dar es Salaam huku akisindikizwa na mamia ya wasanii, wadau, ndugu, jamaa na marafiki waliopambwa na nyuso za huzuni.

Mwili wa Lamania aliyefariki juzi alfajiri ulipumzishwa katika nyumba yake ya milele majira ya saa saba za mchana.

Safari ya makaburini

                  Mwili wa Lamania Shaaban ukiingizwa kaburini

                Mzee Yussuf ni kama haamini

Lamania aliyezaliwa mwaka 1969, mwenyeji wa Zanzibar, alikuwa ndiye mkurugenzi wa muziki wa East African Melody huku akiitungia zaidi ya nyimbo 40 ikiwa ni pamoja na kupanga mashairi na kutia sauti.

Lakini pia hata nyimbo zilizotungwa na watu wengine bado zilipita kwenye dawati lake na kuzifanyia uhariri. Alikuwa hana mpinzani katika gitaa la solo ndani ya Melody.

Alijiunga na East African Melody mwaka 1994 na kuanzia hapo akawa ni moja ya mihimili mikubwa ndani ya kundi hilo.

Mkurugenzi mkuu wa East African Melody, Hajj Mohamed akihojiwa na Hawa Hassan wa ITV

Watoto wa  Lamania Shaaban kutoka kushoto: Fatma, Mohamed, Nasria, Nasra na wa nyuma ni Shaaban

Wasanii kama Mzee Yussuf, Hajj Mohamed, Khadija Kopa, Bi Mwanahawa Ali, Hassan Soud, wote kwa nyakati tofauti waliiambia Saluti5 jana msibani kuwa Lamania ni pengo kubwa katika muziki wa taarab ambalo litachukua muda mrefu kuzibika.