Msuguano huu unazidi kuwakandamiza wasanii

TASNIA ya sanaa ni nyanja ambayo kwa kipindi kirefu imekuwa ikitawaliwa na amani, huku watu wake wakionekana kuwa na furaha na kufanya kazi zao kwa kujitolea zaidi licha ya mapato kiduchu kutokana na kazi zao.

Hata hivyo, kwa takribani mwezi mmoja sasa imekuwa ni mshikemshike. Amani inaanza kutoweka taratibu, huku Wizara ya Habari Vijana, Utamaduni na Michezo ikiwa imelifumbia macho suala hili.

 

Desemba 28, Naibu Waziri, Amos Makalla katika mkutano wake na wasanii ofisini kwake, alijadili kuhusu urasimishaji wa kazi za wasanii ambao ulianza Januari Mosi mwaka huu. Lakini licha ya hilo yapo mengi yaliyojadiliwa ndani yake ikiwa ni pamoja na wizi unaoendelea kufanywa na maharamia wanaojihusisha na kazi za wasanii.

Katika majadala huo kuna baadhi ya wasanii walieleza wazi tatizo hilo, huku wakiwatuhumu baadhi ya viongozi wakubwa wanaoaminiwa kuwalinda wasanii, ambao nao pia walikuwapo katika kikao kile.

Jacob Steven JB, Vicent Kigosi Ray na Bahati Bukuku ni baadhi ya wasanii ambao walitoa dukuduku zao mbele ya Naibu Waziri, huku wakimtuhumu Mtendaji wa Cosota Yustus Mkinga aliyekuwapo katika kikao kile na Makatibu wa Wizara na watendaji wengine wakishuhudia hilo.

Wasanii walitoa ya moyoni, ambayo hata hivyo wizara iliahidi kuyashughulikia lakini hakuna hatua iliyochukuliwa licha ya mhusika kukaa kimya.

Wasanii waliamini kuwa wangesikilizwa na mhusika angewekwa chini na kuulizwa. Januari ilifika na wasanii wakaendelea na kazi zao kama kawaida.

Wasanii hawakupata majibu kwa muda mwafaka. Waliandika barua nyingine, lakini bila kupata majibu hivyo wakaamua kuitisha kikao chao na waandishi wa habari Januari 20 na kuelezea dukuduku lao kabla ya kuamua kuandamana nchi nzima. Ingawa inafahamika kuwa wasanii wa filamu na michezo ya kuigiza wameshauriwa kuzisoma nyaraka mbalimbali za 

Bodi ya Filamu ili wajue sheria na kanuni zinazohusu tasnia hiyo, wao wamedai kuwa zimekuwa zikiwanyonya sana.

Katibu Mtendaji wa Bodi ya Filamu nchini, Joyce Fissoo aliwahi kutoa ufafanuzi juu ya Sheria namba 4 ya Utengenezaji wa Filamu na Michezo ya Kuigiza ya mwaka 1976.

Fissoo alisema sheria hiyo ndiyo inayoendelea kutumika hadi sasa na kukanusha taarifa zilizosambazwa na baadhi ya vyombo vya habari kuhusu uwepo wa matumizi ya sheria mpya.

Alisema hakuna sheria mpya ya Filamu na Michezo ya Kuigiza iliyotungwa, Sheria inayoendelea kutumika ni ile ya mwaka 1976, bali kilichofanyika ni utekelezaji wa kanuni za sheria ya filamu na michezo ya kuigiza, ambapo mchakato wake ulianza mwaka 2011.

Aliwahi pia kuzungumzia kuhusu malalamiko ya baadhi ya wasanii kushindwa kuhimili kulipa ada ya Sh500,000, Fissoo alisema kifungu cha 8 cha sheria hiyo kinampa mamlaka waziri mwenye dhamana husika kutoa msamaha wa malipo kwa msanii mchanga atakayeshindwa kulipa kiasi hicho cha fedha.

Kwani? Ada wanayolipa wasanii ya Sh500,000 ipo toka siku za nyuma, ambapo Sheria Namba 4 ya Filamu na Michezo ya Kuigiza inampa mamlaka waziri husika kutoa msamaha kwa msanii mchanga atakayeshindwa kulipa ada hiyo. Kwamba, msamaha utatolewa pale msanii atakapotoa taarifa kwa waziri na mara baada ya kujiridhisha, ndipo atapitisha msamaha na kutangazwa kwenye gazeti la Serikali.

Hata hivyo, wasanii wao wanadai hawana imani na watendaji wakuu kutoka Cosota na Bodi ya Filamu Tanzania, hivyo kumemtaka Rais Jakaya Mrisho Kikwete kuchukua hatua dhidi ya viongozi hao.

Lalamiko lao msingi wake ni kwamba, hawawezi kwenda katika urasimishaji wakitumia kanuni ambazo baadhi ya vipengele vyake vipo kwa lengo la kumkandamiza msanii na mwandaaji wa filamu.

Kwa kawaida ukaguzi wa ‘script’ unagharimu 60,000 kwa saa mpaka 100,000 na itategemea filamu husika itakaguliwa kwa saa ngapi, huku ukitakiwa kulipia kibali cha kuandaa filamu 500,000 kinachodumu kwa miezi mitatu.

Kwa sasa ni kama vile wezi wa kazi za wasanii hawaiogopi Cosota kabisa na hawa ndiyo marafiki wakubwa na sekta hiyo iliyoundwa na Serikali kuliko wasanii ambao ndiyo chanzo cha uwapo wake.

Mfano ulio wazi ni kwamba, Chama cha Waigizaji Mkoa wa Mwanza kilikamata wezi wa kazi za wasanii cha ajabu tena kwa jeuri mwizi huyo huku akitamba alimpigia simu Yustus Mkinga kumtaarifu kukamatwa kwake, na baada ya hapo akaachiwa polisi.

Suala hili linajenga hisia gani kwa wasanii? Unadhani wana imani na Cosota na kama Cosota iliundwa kwa nia ya kumsaidia msanii, ni kwa nini kina Bahati Bukuku wanafukuzwa wakifika Cosota?,

Mwanamuziki huyu aliongea mbele ya Naibu Waziri wa Habari, Vijana Utamaduni na Michezo Amos Makalla kwa uchungu mkubwa huku akimtaka Yustus Mkinga akane mbele yake.

Bahati Bukuku akielezea namna alivyokamata kazi zake nchini Zambia, akidai watu hao wanafahamiana na Mkinga waliyempigia simu akawatetea.

Alidai akiwa Mbeya alikamata na kumpeleka mtuhumiwa polisi, lakini hali ilikuwa ileile na alivyorudi Cosota hakusikilizwa zaidi ya kupuuzwa na kuelezwa maneno ya kejeli.

Kinachonipa wasiwasi hapa ni tamko la wasanii, kwamba endapo watashindwa kufanya hivyo ndani ya kipindi kifupi Chama cha Waigizaji wa Filamu Tanzania (TDFAA), kitaitisha maandamano ya wasanii nchi nzima.

na yatafanyika mfululizo.

Wasanii hawa wanasema wanamshukuru Rais Jakaya Kikwete kwa jitihada zake za kuongeza ajira kwa vijana, hivyo wangependa kuona mamlaka za sanaa nchini nazo zinaunga mkono.

Wanasema huo ndiyo msingi wa malalamiko yao, Ofisi ya Bodi haitoi ushirikiano katika hoja zao, mtazamo wa kiongozi mtendaji ni kuvuna pesa tu.

Namnukuu Mwenyekiti wa TDFAA, Michael Sangu “Katika hali ya kusikitisha kwa nyakati tofauti ikiwemo katika msiba wa msanii mwenzetu, Juma Kilowoko ‘Sajuki’, Katibu Joyce Fisoo amekuwa akiwaambia baadhi ya wasanii kwamba ‘mnajisumbua hakutakuwa na mabadiliko yoyote ya gharama katika kanuni za filamu, hivyo msihangaike’,” alisema.

Alidai Joyce amekuwa mmoja wa watendaji wa Serikali wasiowatakia mapenzi mema wasanii na kwamba ushahidi upo wa kutosha ikiwemo katika vikao kadhaa mtendaji huyo amekuwa akiwapuuza.

Suala hili ni nyeti linalotakiwa kuangaliwa kwa ukaribu zaidi ili kuweza kuiweka sekta ya sanaa katika hali nzuri.