Omari Omari kuzikwa leo TEMEKE

Marehemu Omari Omari atazikwa January 9 2013

MWANAMUZIKI mahiri wa miondoko ya Mchiriku, Omari Omari (41), aliyefariki dunia usiku wa kuamkia jana na anatarajiwa kuzikwa leo saa 7 mchana katika makaburi ya Maganga, Temeke Mikoroshini jijini Dar es Salaam.

Akizungumza nyumbani kwao Temeke Mikoroshini jana, dada wa marehemu, Vingawaje 

Omari alisema, mwili wa marehemu unatarajiwa kuagwa leo saa 6 mchana, kabla ya mazishi baada ya kukamilika kwa taratibu zote, ikiwa ni pamoja na kuwasili kwa ndugu na jamaa kutoka sehemu mbalimbali.

Vingawaje alisema, marehemu alikuwa anasumbuliwa na maradhi ya kifua. Januari 5 alizidiwa na kukimbizwa katika hospitali ya Wilaya ya Temeke na juzi aliruhusiwa kabla ya kukutwa na umauti nyumbani kwao Temeke Mikoroshini, saa 8 usiku wa kuamkia jana.

“Nimepokea msiba huu kwa masikitiko makubwa, ukizingatia kwamba mimi ndiyo mkubwa wa marehemu katika familia ya watoto saba, hivyo ni pigo kwangu na familia kwa ujumla, kwa kuwa tumempoteza ndugu yetu tuliyemtegemea,” alisema Vingawaje.

Katiha enzi ya uhai wake, Omari aliwahi kutamba katika tasnia hiyo kupitia wimbo wake wa 

‘Kupata Majaliwa’ ulibeba albamu na kurekodiwa katika studio ya Dhahabu Tabata, jijini Dar es Salaam, akishirikiana na kikundi cha Atomic.

Mmoja wa wasanii aliyeshirikiana na marehemu katika kundi hilo ni Mfaume Suleiman ‘Dogo Mfaume’, aliyesema amepokea kwa masikitiko makubwa taarifa za msiba huo.

“Nimesikitishwa sana na taarifa za msiba, kwani nimempoteza ndugu yangu niliyemtegemea kwa kiasi kikubwa, kwani amenisaidia kwa kiasi kikubwa kujulikana katika tasnia ya muziki, kwa kuwa yeye ndiye aliyenitungia nyimbo ya ‘Kazi ya Dukani’ wimbo ambao bila yeye nisingeufanya,” alisema Dogo Mfaume.

Naye mwandaaji wa muziki kutoka katika studio ya Mkubwa na Wanawe, Promota Bonga, alisema kuwa, amesikitishwa na kufariki kwa mwanamuziki aliyetarajia kumshirikisha katika kazi mbalimbali za muziki, kutokana na uwezo aliyokuwanao wa kupiga vyombo vya muziki na kuimba.

“Tumempoteza mtu muhimu mno katika tasnia ya muziki, kwani amewainua chipukizi wengi, kwa kuwa alikuwa na uwezo mkubwa wa kupiga kinanda pamoja na ngoma, hivyo tunashukuru kwa kuwa ni mipango ya Mungu,” alisema Bonga.