Wajawazito walalamikia Hospitali ya Dodoma.

KINA mama wajawazito ambao wamewekwa katika nyumba ya kujitazamia kwa ajili ya kusubiri kujifungua maarufu kwa jina la (Chikande) katika Hospitali ya Mkoa wa Dodoma wamelalamikia huduma mbovu zinazotolewa katika nyumba hiyo ikiwa ni pamoja na kukuthiri kwa kunguni.

Malalamiko hayo yalitolewa na baadhi ya akina mama wajawazito walipokuwa wakizungumza na Tanzania daima iliyotembelea eneo hilo kwa ajili ya kujionea hali akina mama hao.

Wakizungumza kwa nyakati tofauti kina mama hao walisema katika nyumba hiyo kwa sasa wanaishi katika mazingira magumu kutokana na kutopata huduma ambayo inastahili.

Mbali na hilo walisema idadi ya wagonjwa wanaopokelewa katika nyumba hiyo kwa sasa imezidi na kuwafanya wagonjwa wengine kulala chini huku wengine wakilala wawili hadi watatu katika kitanda kimoja.“Kituo hiki kina uwezo wa kupokea wagonjwa 30 kwani kuna vitanda 15 ambapo kila kitanda tunalala watu wawili lakini kwa sasa idadi imezidi hadi kufikia wagonjwa 100 hali inayosababisha kuwepo kwa msongamano mkubwa kutokana na uhaba wa vitanda hivyo wagonjwa wanalazimika kulala watatu katika kitanda kimoja na wengine kulala chini…

“Licha ya wagonjwa kulala chini lakini bado wagonjwa wengine wanalazimika kupokezana kwa wengine kulala nje kwani hawawezi kutosha kulala nyumba moja wote kwa wakati mmoja jambo ambalo walidai kuwa ni hatari kwa afya zao,” alisema mmoja wa kina mama hao aliyejitabulisha kwa jina la Mwalu Mboje .

Aidha mgonjwa mwingine aliyejitambulisha kwa jina la Monica Silla (29) aliyetokea Kijiji cha Ng’hambabu Wilaya ya Chamwino, mkoani hapa amesema kituo hicho kinakabiliwa na tatizo la kunguni na mbu, hali inayohataraisha afya zao.

Monica aliweka wazi kuwa tayari walisha wasilisha malalamiko yao kwa wauguzi kituoni hapo lakini hakuna jitihada zilizofanywa wala bwana afya yeyote aliyewahi kutembelea kituoni hapo ili kujua changamoto wanazokumbana nazo.

Nyumba hiyo ya Chikande iliyopo ndani ya hospitali ya Mkoa wa Dodoma inapokea kina mama wajawazito kutoka wilaya za Bahi, Chamwino, Manyoni na vijiji vya pembeni katika Wilaya ya Dodoma Mjini wenye matatizo wakati wa kujifungua, ikiwa na wale ambao ni walemavu, wenye ugonjwa wa kifafa na wale waishio mbali na vituo vya huduma za afya.

Kutokana na matatizo yanayoikabili nyumba hiyo, alipotafutwa kwa njia ya simu Mganga Mkuu wa Hospitali ya Mkoa wa Dodoma, Dk. Ezekiel Mpuya, simu yake iliita bila majibu na baada ya dakika 5 simu yake iliita na kupokewa na baada ya mwandishi kujitambulisha tu alikata simu. HABARI NA MARTIN MALERA WA TANZANIA DAIMA