Wanachuo wa IFM wamweka Kova kitimoto

KAMANDA wa Polisi Kanda Maalumu ya Dar es Salaam, Suleiman Kova, jana aliwekwa kiti moto na wanafunzi wa Chuo cha Usimamizi wa Fedha (IFM), wakilalamikia kiteno cha polisi kutowachukulia hatua watuhumiwa waliowadhalilisha wanafunzi wenzao kwa kuwaingilia kinyume cha maumbile na kuwaibia mali zao.

Wanafunzi hao ambao waliandamana kutoka kwenye hosteli zao eneo la Kigamboni hadi makao makuu ya Jeshi la Polisi, walilazimika kuongozana na Kamanda Kova hadi kwenye makazi yao, hivyo akawaahidi kufuatilia na kuwafichua vibaka hao.

Akizungumza na wanafunzi hao kwenye viwanja vya Machava, alisema zoezi hilo la kuwafichua vibaka hao litawahusisha wanafunzi watatu wakishirikiana na polisi watatu, ambao watafanya kazi takriban wiki mbili na kutoa ufafanuzi Januari 30, mwaka huu.

Wanafunzi hao walidai kulawitiwa, kuibiwa kompyuta mpakato 300 pamoja na fedha taslimu ambazo hazijafahamika thamani yake hadi sasa.

“Mosi nasikitika taarifa hizi kuzipata juzi, hivyo nawaahidi kuzishughulikia kikamilifu kwa kuwa matukio hayo hayajaripotiwa, ni bora yaripotiwe polisi sasa ili hatua za haraka zichukuliwe,” alisema Kova.

Rais wa wanafunzi wa chuo hicho, Michael Charles, alieleza kuwa mbali na ukatili wa vitendo hivyo, Kituo Kidogo cha Polisi cha Kigamboni kimeshindwa kuyatatua matatizo hayo na kuwafichua vibaka hao wakati orodha yao inafahamika.

Alisema wanafunzi waliofanyiwa ukatili wa kulawitiwa hadi sasa ni wawili huku wengine walipigwa na kuumizwa sehemu mbalimbali za miili yao.

Wakati huo huo, mtoto Abdallah Mohamed (9), naye aliahidi kufichua maficho ya vibaka hao kwani anawafahamu.

Maandamano ya wanafunzi hao yalianzia Ofisi za Wizara ya Mambo ya Ndani na kupiga kambi Kivukoni, ambapo yalidumu kwa saa kadhaa kabla ya Jeshi la Polisi kuingilia kati.