Listen ya Belle 9 kuipuliwa leo Bills..Kusindikizwa na wakali kibao

MSANII wa muziki wa kizazi kipya nchini, Abdenego Damian, maarufu kama ‘Belle 9’ leo anatarajiwa kuzindua rasmi video na wimbo wake ‘Listen’, uzinduzi unaotarajiwa kufanyika katika Ukumbi wa Club Bilicanas, uliopo katikati ya Jiji la Dar es Salaam.

Akizungumza jijini Dar es Salaam juzi, mkali huyo kutoka Morogoro alisema amekuwa katika maandalizi kabambe ya uzinduzi huo na hasa ikizingatiwa kuwa itakuwa shoo yake ya kwanza tangu kuanza kwa mwaka 2013.

Alisema kupitia onesho hilo mashabiki watarajie kupokea mambo makubwa kutoka kwake ambayo yatawafanya kutojutia kutoa fedha zao kuhudhuria ndani ya ukumbi huo.

Mbali na Listen aliyoaiachia mwishoni mwaka 2012, Belle 9 amepata kutamba na singo kadhaa zilizoweza kushika chati kwenye vituo mbalimbali zikiwemo Sumu ya Penzi, Masogange, wewe ni wangu, Amerudi na nyinginezo.

Katika kunogesha usiku wa leo pia wasanii kadhaa wanatarajiwa kusindikiza wakiwamo Kala Jeremiah, Nikki Mbishi, Amiri Milli, Ben Pol, Mansu –Li, Young Killer na wengineo, ambapo kiingilio ni sh 6,000 kwa kila mtu.