Jela miaka 30 kwa kubaka

MKAZI wa Nyakato, Amiri Bakari (18) amehukumiwa na Mahakama ya Hakimu Mkazi Mkoa wa Mara, kutumikia kifungo cha miaka 30 jela, baada ya kupatikana na hatia ya kumbaka binti mwenye umri wa miaka 16.

Hukumu hiyo ilitolewa juzi mbele ya Hakimu Mkazi, Janeth Msaroche, baada ya kuridhika na ushahidi uliotolewa na upande wa mashitaka.

Awali ilidaiwa mahakamani hapo na Mwendesha Mashitaka wa Polisi, Jonas Kaijage, kuwa mshitakiwa alitenda kosa hilo Januari 10, mwaka jana, majira ya saa 3:00 asubuhi katika eneo la Vailet Baa, Mtaa wa Nyakato mjini Musoma.

Kaijage aliiambia mahakama hiyo kuwa mshitakiwa huyo alimbaka binti huyo alipopita katika eneo hilo na kumvutia ndani ya nyumba isiyomalizika kujengwa.

Alidai kuwa mtuhumiwa huyo baada ya kutimiza hatua hiyo alimbaka binti huyo huku akimtishia kwa panga alilokuwa nalo na kwamba iwapo atapiga kelele atamuua.

Alisema kuwa mshitakiwa huyo baada ya kufanya unyama huo alitokomea kusikojulikana huku binti huyo alikwenda kutoa taarifa kwa wazazi wake waliokwenda katika eneo la tukio na kukuta chupi ya binti huyo, kisha kutoa taarifa polisi ndipo mshitakiwa alipokamatwa.

Akijitetea kabla ya hukumu, mshitakiwa aliiomba mahakama impunguzie adhabu huku Hakimu Msaroche akidai kuwa ametoa adhabu hiyo ili iwe fundisho kwa mshitakiwa na kwa watu wenye tabia kama hiyo.